ബലാത്സംഗത്തിനിരയായി പ്രസവിച്ച 16കാരിയുടെ കുഞ്ഞിനെ ബന്ധു 90000 രൂപക്ക്​ വിറ്റു

നാഗ്​പൂർ: ബലാത്സംഗത്തിനിരയായി പ്രസവിച്ച 16കാരിയുടെ രണ്ട്​ മാസം പ്രായമായ പെൺകുഞ്ഞിനെ ബന്ധു 90,000 രൂപക്ക്​ വിറ്റു. ദത്ത്​ നൽകുകയാണെന്ന പേരിലാണ്​ കുഞ്ഞിനെ ബന്ധു വിറ്റത്​. വനിത-ശിശുക്ഷേമ വകുപ്പിന്‍റെ പരാതിയുടെ അടിസ്​ഥാനത്തിലാണ്​ കോട്​വാലി പൊലീസ്​ കേസിൽ ഇടപെട്ടത്​.

കുഞ്ഞിനെ വാങ്ങിയ സ്​ത്രീക്ക്​ ബന്ധു 100 രൂപയുടെ മുദ്രപത്രത്തിൽ ഒപ്പിട്ടു നൽകിയിട്ടുണ്ട്​. കേസിന്​ അനധികൃത ദത്തെടുക്കൽ മാഫിയ, മനുഷ്യക്കടത്ത്​ സംഘം എന്നിവയുമായി ബന്ധമുണ്ടോയെന്ന്​ പൊലീസ്​ അന്വേഷിച്ച്​ വരികയാണ്​.

'അനധികൃതമായ സംവിധാനത്തിലൂടെ ദത്തെടുക്കാനുള്ള പണ കൈമാറ്റം കുറ്റകരമാണ്. ഇന്ത്യൻ ശിക്ഷാനിയമത്തിൽ മനുഷ്യക്കടത്തിന്‍റെ ഗണത്തിലാണ്​ ഇത്​ പെടുത്തുക' -ജില്ല ചൈൽഡ്​ പ്രൊട്ടക്ഷൻ ഓഫിസർ മുഷ്​താഖ്​ പത്താൻ പറഞ്ഞു.

ബന്ധു തന്‍റെ കുഞ്ഞിനെ 90,000 രൂപക്ക്​ വിറ്റതായി പീഡനത്തിനിരയായ പെൺകുട്ടി കൗൺസിലർക്ക്​ മൊഴി നൽകി. അമ്മയെയും കുഞ്ഞിനെയും രക്ഷിക്കാനും ഏതെങ്കിലും സർക്കാർ സംരക്ഷണ കേന്ദ്രത്തിലേക്ക്​ മാറ്റാനും വനിതാ-ശിശുക്ഷേമ വകുപ്പ് പൊലീസിനോട്​ ആവശ്യപ്പെട്ടു.

ചുപ്രു നഗറിൽ വെച്ചാണ്​ കുഞ്ഞിനെ കൈമാറ്റം ചെയ്​തത്​. നാരിയിൽ വെച്ച്​ ബന്ധുവിന്​ പണം നൽകി. മേയിലാണ്​ പ്രായപൂർത്തിയാകാത്ത പെൺകുട്ടി ആറുമാസം ഗർഭിണിയാണെന്നറിഞ്ഞത്​. അയൽവാസിയായ 16കാരനെതിരെ കോട്​വാലി പൊലീസ്​ സ്​റ്റേഷനിൽ കേസ്​ രജിസ്റ്റർ ചെയ്​തു. ജൂലൈ അവസാനമാണ്​ പെൺകുഞ്ഞിന്​ ജന്മം നൽകിയത്​.

പിതാവ്​ നേരത്തെ മരിക്കുകയും മാതാവ്​ ഉപേക്ഷിക്കുകയും ചെയ്​തതോടെ ബന്ധുക്ക​ൾക്കൊപ്പമായിരുന്നു പെൺകുട്ടിയുടെ താമസം. കുഞ്ഞിനെ വളർത്തണമെന്നായിരുന്നു പെൺകുട്ടിയുടെ ആഗ്രഹം. എന്നാൽ ബന്ധുക്കൾ നിർബന്ധിപ്പിച്ച്​ കുഞ്ഞിനെ ദത്തുനൽകാനെന്ന വ്യാജേന വിൽക്കുകയായിരുന്നു.

പെൺകുട്ടിയെ ബന്ധുക്കൾ നേരത്തെ ഗുജറാത്തിലേക്ക്​ വിവാഹം ചെയ്​തയക്കാൻ പദ്ധതിയിട്ടിരുന്നെങ്കിലും പ്രായപൂർത്തിയാകാത്തതിനാൽ നടന്നില്ലെന്ന്​ കുടുംബത്തിൽ പെട്ട ചിലർ പറഞ്ഞു. പൊലീസ്​ തേടി​വരുമെന്ന്​ മനസിലായതോടെ കുഞ്ഞിനെ വാങ്ങിയ സ്​ത്രീ മൊബൈൽഫോൺ സ്വിച്​ഓഫ്​ ചെയ്​തിരിക്കുകയാണ്​.