ഗർഭിണിയായ കിർഗിസ്​ യുവതി​യും മകനും ഡൽഹിയിലെ സുഹൃത്തിന്‍റെ വീട്ടിൽ കൊല്ലപ്പെട്ട നിലയിൽ

ന്യൂഡൽഹി: കിർഗിസ്​താൻ സ്വദേശിയായ ഗർഭിണിയെയും ഒരുവയസ്​ പ്രായമായ മകനെയും ഡൽഹിയിലെ സുഹൃത്തിന്‍റെ വീട്ടിൽ കൊല്ലപ്പെട്ട നിലയിൽ കണ്ടെത്തി. ഡൽഹിയിലെ കൽക്കാജി പ്രദേശത്ത്​ ചൊവ്വാഴ്ചയാണ്​ സംഭവം. മിസ്​കാൽ സുമാബേവയും (28) മകൻ മാനസുമാണ്​ മരിച്ചത്​. ഇരുവരുടെയും നെഞ്ചിലും മറ്റ്​ ശരീരഭാഗങ്ങളിലും കുത്തേറ്റ പാടുകളുണ്ട്​. യുവതി അഞ്ച്​​ മാസം ഗർഭിണിയായിരുന്നു.

ഭർത്താവ്​ വിനയ്​ ചൗഹാനൊപ്പം ഗ്രേറ്റർ കൈലാശിലായിരുന്നു മിസ്​കാലിന്‍റെ താമസം. ഗസ്റ്റ്​ ഹൗസുകൾ നടത്തി വരികയായിരുന്നു വിനയ്​ ചൗഹാൻ. രണ്ടുവർഷം മുമ്പായിരുന്നു ഇരുവരുടെയും വിവാഹം. 13 മാസമാണ്​ മകന്‍റെ പ്രായം.

'കൽക്കാജിയിൽ യുവതിയെയും കുഞ്ഞിനെയും കൊലപ്പെടുത്തിയതായി ഞങ്ങൾക്ക്​ സന്ദേശം വന്നു. സംഭവ സ്​ഥലത്തെത്തിയപ്പോൾ കുത്തേറ്റ പാടുകളുമായി കിർഗിസ്​താൻ യുവതിയും മകനും കിടക്കയിൽ മരിച്ചുകിടക്കുന്നതാണ്​ കണ്ടത്' -ഡി.സി.പി ആർ.പി മീണ പറഞ്ഞു. ക്രൈം ആൻഡ്​ ഫോറൻസിക്​ വിഭാഗം സ്​ഥലം സന്ദർശിച്ചു.

തിങ്കളാഴ്​ച രാത്രി ആശുപത്രിയിൽ പോകുന്നത്​ സംബന്ധിച്ച്​ മിസ്​കാലും ഭർത്താവും തമ്മിൽ വഴക്ക്​ നടന്നതായി പൊലീസ്​ പ്രാഥമിക അന്വേഷണത്തിൽ കണ്ടെത്തി. വഴക്കിട്ട വിനയ്​ വീട്​ വിട്ട്​ ഗ്രേറ്റർ കൈലാശിലുള്ള സുഹൃത്ത്​ വാഹിദിനെ കാണാനായി പോയി.

അതേദിവസം സുഹൃത്തായ മത്​ലുബ മഡുസ്​മനോവയും അവരുടെ കൂട്ടുകാരൻ അവനിഷും​ മിസ്​കാലിനെ ആശുപത്രിയിൽ എത്തിച്ചു. ഉസ്​ബെക്കിസ്​താൻ സ്വദേശിയാണ്​ മത്​ലുബ. ആശുപത്രിയിൽ നിന്ന്​​ മത്​ലുബ മിസ്​കലിനെയും കുഞ്ഞിനെയും കൽക്കഞ്ചിലെ തന്‍റെ വീട്ടിലേക്കാണ്​​ കൊണ്ടുപോയത്​.

ഇരുവരുടെയും ചില സുഹൃത്തുക്കളും അന്ന്​ ഫ്ലാറ്റ്​ സന്ദർശിച്ച്​ മടങ്ങിയതായി പൊലീസ്​ പറഞ്ഞു. ആശുപത്രി സന്ദർശനത്തെ കുറിച്ചും തങ്ങളുടെ താമസത്തെ കുറിച്ചും യുവതി ഭർത്താവിനെ വിളിച്ച്​ അറിയിച്ചിരുന്നു.

വീടിന്‍റെ ഉൾഭാഗത്ത്​ സി.സി.ടി.വി ക്യാമറകൾ ഇല്ലെന്നും മറ്റ്​ ക്യാമറകളിൽ പുറത്ത്​ നിന്ന്​ ആരും തന്നെ അകത്തേക്ക്​ കടന്നതായി കാണുന്നില്ലെന്നും പൊലീസ്​ പറഞ്ഞു. കേസ്​ രജിസ്റ്റർ ചെയ്​ത്​ പൊലീസ്​ അന്വേഷണം ആരംഭിച്ചു.