കൊലക്ക്​ ശേഷവും കൂസലില്ലാതെ പ്രതി; നിഥിന തിരിച്ചുവരുമെന്ന പ്രതീക്ഷയിൽ അമ്മ

പാലാ സെന്‍റ്​ തോമസ്​ കോളജിൽ നാടിനെ നടുക്കിയ കൊലക്ക്​ ശേഷവും കൂസലില്ലാതെ പ്രതി. സഹപാഠിയുടെ കഴുത്തറുത്തിട്ട ശേഷം സമീപത്തിരുന്ന പ്രതി പൊലീസ്​ വാഹനം വന്നപ്പോൾ എതിർപ്പൊന്നും കൂടാതെ അതിൽ കയറി.

പാലാ സെന്‍റ്​ തോമസ്​ കോളജിൽ പരീക്ഷക്കെത്തിയ​ നിഥിന മോളെ സഹപാഠി അഭിഷേക്​ ബൈജുവാണ്​ കഴുത്തറുത്ത്​ കൊന്നത്​. പ്രണയ നൈരാശ്യമാണ്​ കൊലക്ക്​ പിന്നിലെന്ന്​ പൊലീസ്​ പറയുന്നു.

നിഥിനയെ കഴുത്തിന്​ പിടിച്ച്​ നിലത്തിരുത്തിയ ശേഷം കയ്യിൽ കരുതിയ ചെറിയ പേനാ കത്തികൊണ്ട് കഴു​ത്ത്​ മുറിക്കുകയായിരുന്നു. ശേഷം കൈതുടച്ച്​ സമീപത്തെ കസേരയിൽ പോയിരുന്ന പ്രതിക്ക്​ ഭാവ വ്യത്യാസമൊന്നും ഉണ്ടായിരുന്നില്ല.

രക്​തമൊഴുകുന്ന നിലയിൽ നിലത്തു വീണ വിദ്യാർഥിനിയെ സമീപത്തെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. പൊലീസെത്തിയപ്പോൾ കുസലൊന്നുമില്ലാതെ വാഹനത്തിൽ കയറി.

സ്വന്തം കൈമുറിച്ച്​ ഭീഷണിപ്പെടുത്താനാണ്​ കത്തി കൈയിൽ കരുതിയതെന്നാണ്​ അഭിഷേക്​ പൊലീസിനോട്​ പിന്നീട്​ പറഞ്ഞത്​.

നിഥിനയുടെ മൊബൈൽ ഫോൺ അഭിഷേക്​ കൈവശപ്പെടുത്തിയിരുന്നെന്നും പരീക്ഷക്കെത്തിയപ്പോഴാണ്​ അത്​ തിരിച്ചു നൽകിയതെന്നും പെൺകുട്ടിയുടെ മാതാവ്​ പറഞ്ഞു. ഫോൺ തിരിച്ച്​ നൽകാൻ പെൺകുട്ടിയുടെ മാതാവ്​ അഭിഷേകിനോട്​ ആവശ്യപ്പെട്ടിരുന്നു. പെൺകുട്ടി അമ്മയോട്​ ഫോണിൽ സംസാരിച്ച ശേഷമാണ്​ അഭിഷേക്​ കൊടും ക്രൂരത ചെയ്​തത്​. പെൺകുട്ടിയുടെ മരണം ഇതുവരെയും വിശ്വസിക്കാനാകാത്ത അമ്മ, അവൾ തിരിച്ചുവരുമെന്ന പ്രതീക്ഷയിലാണ്​ ഇപ്പോഴും.