വിവാഹത്തിന്​ സമ്മതിച്ചില്ല; പിതാവിനെ മകളും കാമുകനും കൊന്ന്​ മരത്തിൽ കെട്ടിത്തൂക്കി

ലഖ്​നേ: വിവാഹത്തിന്​ സമ്മതം നൽകാത്തതിന്​ യുവതി പിതാവിനെ കാമുകന്‍റെ സഹായത്തോടെ കൊലപ്പെടുത്തി മരത്തിൽ കെട്ടിത്തൂക്കി. ഉത്തർപ്രദേശിലെ ബറേലിയിലാണ്​ സംഭവം. മകൾ പ്രീതിയെയും ധർമേന്ദ്ര യാദവിനെയും പൊലീസ്​ ബാദുനിൽ നിന്ന്​ അറസ്റ്റ്​ ചെയ്​തു. മൂന്നാം പ്രതി ഒളിവിലാണ്​.

46കാരനായ ഹർപാൽ സിങ്ങാണ്​ മരിച്ചത്​. കർഷകനായ ഹർപാൽ മകളെ വിവാഹതിന്​ സമ്മതി​ച്ചില്ലെന്ന്​ മാത്രമല്ല സ്വന്തമായുണ്ടായിരുന്ന ഭൂമി നൽകാനും വിസമ്മതിച്ചു. ഇതോടെയാണ്​ പിതാവിനെ കൊല്ലാൻ മകളും കാമുകനും തീരുമാനിച്ചത്​. ഹർപാലിനെ മദ്യം നൽകി മയക്കിയ ശേഷം ബോധം പോകുന്നത്​ വരെ പ്രീതിയും കാമുകനും ഇരുമ്പ്​ വടി ഉപയോഗിച്ച്​ മർദിച്ചു.

ബറേലിയിലെ സംഭൽ ഗ്രാമത്തിൽ മരത്തിൽ തൂങ്ങിക്കിടക്കുന്ന നിലയിലായിരുന്നു ഹർപാലിന്‍റെ മൃതദേഹം. പ്രാഥമിക നിഗമനത്തിൽ ആത്മഹത്യയായിരുന്നു. എന്നാൽ പോസ്റ്റ്​മോർട്ടത്തിലാണ്​ കൊലപാതകമാണെന്ന്​ മനസിലായത്​.

ഹർപാലിന്‍റെ ശരീരത്തിൽ കണ്ട മർദനത്തിന്‍റെ പാടുകൾ ശ്രദ്ധയിൽ പെട്ടതിന്‍റെ അടിസ്​ഥാനത്തിലാണ്​ പൊലീസ്​ കൂടുതൽ അന്വേഷണം തുടങ്ങിയത്​. ജൂലൈ 19ന്​ കൃഷിയിടത്തിൽ പോയ ഹർപാൽ പിന്നീട്​ മടങ്ങിയെത്തിയില്ലെന്ന്​ ഭാര്യ പൊലീസിൽ പരാതിപ്പെട്ടിരുന്നു. പിറ്റേ ദിവസമാണ്​ ഹർപാലിനെ മരത്തിൽ തൂങ്ങിയ നിലയിൽ കണ്ടെത്തിയത്​.

ഹർപാലി​ന്‍റെ മകളും കാമുകനും മറ്റൊരാളും ചേർന്നാണ്​ ഗൂഢാലോചന നടത്തിയതെന്ന്​ പൊലീസ്​ കണ്ടെത്തി. പിതാവ്​ മരിച്ച ദിവസം മകൾ കാമുകന്‍റെ ഫോണിലേക്ക്​ നിരന്തരം വിളിച്ചത്​ ശ്രദ്ധയിൽ പെട്ടതോടെയാണ്​ പൊലീസിന്​ സംശയം തോന്നിയത്​. ചോദ്യം ചെയ്യലിൽ പ്രതികൾ കുറ്റം സമ്മതിച്ചു. കൊലപാതകം ക്രിമിനൽ ഗൂഢാലോചന എന്നീ കുറ്റങ്ങൾ ചുമത്തി പ്രതികൾക്കെതിരെ എഫ്​.ഐ.ആർ രജിസ്റ്റർ ചെയ്​തു.