ഭാര്യക്കായി 10,000 രൂപ വാഗ്​ദാനം ചെയ്​തു; 80കാരനെ കൊലപ്പെടുത്തിയ 33കാരൻ അറസ്റ്റിൽ

മുംബൈ: ഭാര്യയെ വിട്ടുനൽകാൻ 10,000 രൂപ വാഗ്​ദാനം ചെയ്​ത 80കാരനെ കൊലപ്പെടുത്തിയ 33കാരൻ അറസ്റ്റിൽ. 80കാരനായ ശമാകാന്ത്​ തുകാരം നായിക്കാണ്​ മരിച്ചത്​.

നവി മുംബൈയിലെ പ്രമാണിയാണ്​ നായിക്​. നിരവധി കടകളും ഫ്ലാറ്റുകളു​ം സ്​ഥലവും ഉൾപ്പെടെ കോടിക്കണക്കിന്​ സ്വത്തുക്കൾ ഇയാളുടെ പേരിലുണ്ട്​.

കടയുടെ ഉടമയാണ്​ പ്രതിയായ 33കാരൻ. ഇയാളുടെ കടയിൽ നായിക്​ സ്​ഥിരം ചെല്ലുമായിരുന്നു. അത്ത​രമൊരു അവസരത്തിൽ നായിക്​ 33കാരന്​ 5000രൂപ വാഗ്​ദാനം ചെയ്യുകയും ഭാര്യയെ ഇയാളുടെ ഗോഡൗണിലേക്ക്​ അയക്കണമെന്ന്​ ആവശ്യപ്പെടുകയുമായിരുന്നു. അന്ന്​ ഇരുവരും തമ്മിൽ വാക്കുതർക്കമുണ്ടായിരുന്നു.

ആഗസ്റ്റ്​ 29നും സംഭവം ആവർത്തിച്ചു. നായിക്​ കടയിലെത്തി ഭാര്യയെ ഗോഡൗണിലേക്ക്​ അയച്ചാൽ 10,000 രൂപ നൽകാമെന്ന്​ വാഗ്​ദാനം​ ചെയ്യുകയായിരുന്നു. ഇതോടെ നായിക്കിന്‍റെ ആവശ്യത്തിൽ പ്രകോപിതനായ 33കാരൻ ഇയാളെ തള്ളിയിടുകയും തലക്ക്​ അടിക്കുകയുമായിരുന്നു. ഉടൻ തന്നെ കടയുടെ ഷട്ടർ അടച്ച്​ മൃതദേഹം വാഷ്​റൂമിലേക്ക്​ മാറ്റുകയും ചെയ്​തു.

ആഗസ്റ്റ്​ 31വരെ മൃതദേഹം വാഷ്​റൂമിൽ സൂക്ഷിച്ചു. പിറ്റേന്ന്​ രാവിലെ അഞ്ചുമണിയോടെ 33കാരൻ നായിക്കിന്‍റെ മൃതദേഹം ബെഡ്​ഷീറ്റിൽ പൊതിഞ്ഞ്​ ബൈക്കിൽ കയറ്റി കൊണ്ടുപോയി കുളത്തിൽ എറിയുകയായിരുന്നു. എന്നാൽ, സംഭവത്തിന്‍റെ ദൃശ്യങ്ങൾ സി.സി.ടി.വിയിൽ പതിഞ്ഞു. നായിക്കിന്‍റെ വസ്​ത്രവും മൊബൈൽ ഫോണും മാലിന്യകുട്ടയിൽ എറിയുകയും ചെയ്​തിരുന്നു. അവ കണ്ടെത്താൻ കഴിഞ്ഞിട്ടില്ല.

പിതാവിനെ കാണാനില്ലെന്ന പരാതി നൽകാൻ നായിക്കിന്‍റെ മകനൊപ്പം പ്രതി ​ ആഗസ്റ്റ്​ 29ന്​ പൊലീസ്​ സ്റ്റേഷനിലെത്തിയിരുന്നു. ആഗസ്റ്റ്​ 29ന്​ വൈകിട്ട്​ വീട്ടിൽനിന്നിറങ്ങിയ 80കാര​ൻ തിരിച്ചെത്തിയില്ലെന്നാണ്​ പരാതി. മൊബൈൽ ഫോൺ സ്വിച്ച്​ ഓഫാണെന്നും പറയുന്നു. സ്വത്ത്​ തർക്കത്തെ തുടർന്നാണ്​ കൊലപാതകമെന്നായിരുന്നു പൊലീസ്​ കരുതിയത്​. പിന്നീട്​ സി.സി.ടി.വി ദൃശ്യങ്ങളിലൂടെ കടയുടമയിലേക്ക്​ എത്തുകയായിരുന്നു. 33കാരനെ പൊലീസ്​ അറസ്റ്റ്​ ചെയ്​തു.