എറണാകുളത്ത് ഹോട്ടലിൽ ഒരാളെ കുത്തിക്കൊന്നു

കൊച്ചി: ടൗൺഹാളിന് സമീപം ഹോട്ടലിൽ ഭക്ഷണം കഴിക്കാനെത്തിയവ‌ർ തമ്മിലുണ്ടായ തർക്കത്തിൽ ഒരാളെ കുത്തിക്കൊന്നു. കൊല്ലപ്പെട്ടയാളെ തിരിച്ചറിഞ്ഞിട്ടില്ല. കൊല്ലം സ്വദേശിയാണ്​ കൊല്ലപ്പെട്ടതെന്ന്​ പൊലീസ് സംശയിക്കുന്നു. പ്രതി ടൗൺഹാളിന് സമീപം ലോഡ്ജിൽ താമസിക്കുന്ന മുളവുകാട് സ്വദേശിയാണെന്ന്​ പൊലീസ്​ പറയുന്നു. ഇയാൾക്ക്​ വേണ്ടി നഗരത്തിൽ തിരച്ചിൽ തുടരുകയാണ്​.

ബുധനാഴ്ച രാത്രി ഒമ്പതോടെയാണ് സംഭവം. നോർത്ത്​ പാലത്തിനടിയിൽ പ്രവർത്തിക്കുന്ന ആനന്ദ്​ ബിഹാർ എന്ന ഹോട്ടലിന് മുന്നിലിട്ടാണ്​ കുത്തിക്കൊന്നത്​. ഭക്ഷണം കഴിക്കാനെത്തിയതായിരുന്നു ഇരുവരും. അപരിചിതരായ ഇവർ തമ്മിൽ വാക്കുതർക്കം ഉണ്ടാവുകയും പ്രതിയുടെ കൈയിൽ സൂക്ഷിച്ചിരുന്ന മദ്യക്കുപ്പി പൊട്ടിച്ച് കഴുത്തിൽ കുത്തുകയുമായിരുന്നു. കൊലപാതകത്തിന്​ ശേഷം ലോഡ്ജിലെത്തി പ്രതി തന്റെ സാധനങ്ങളുമെടുത്ത് രക്ഷപ്പെട്ടു. സ്ഥലത്തെത്തി മുറി പരിശോധിച്ചപ്പോൾ ലഭിച്ച ആധാർ കാർഡിലെ സൂചന വെച്ചാണ്​ പൊലീസ്​ തിരച്ചിൽ നടത്തുന്നത്​. കൊല്ലപ്പെട്ടയാളുടെ മൃതദേഹം ജനറൽ ആശുപത്രിയിലേക്ക് മാറ്റി