മലാശയത്തിൽ 42ലക്ഷം രൂപയുടെ സ്വ​ർണം പേസ്റ്റ്​ രൂപത്തിൽ; ഇംഫാൽ വിമാനത്താവളത്തിൽ മലയാളി പിടിയിൽ

ന്യൂഡൽഹി: മലാശയത്തിനുള്ളിൽ 42ലക്ഷം രൂപ വിലവരുന്ന ദ്രവരൂപത്തിലുള്ള സ്വർണം കടത്താൻ ശ്രമിക്കുന്നതിനിടെ കോഴി​ക്കോട്​ സ്വദേശി മണിപ്പൂരിലെ ഇംഫാൽ വിമാനത്താവളത്തിൽ പിടിയിൽ. കോഴി​േ​ക്കാട്​ സ്വദേശിയായ മുഹമ്മദ്​ ഷരീഫാണ്​ പിടിയിലായത്​.

900ഗ്രാം സ്വ​ർണമാണ്​ ഇയാളിൽനിന്ന്​ പിടികൂടിയത്​. തുടർന്ന്​ സി.ഐ.എസ്​.എഫ്​ ഷരീഫിന്‍റെ അറസ്റ്റ്​ രേഖപ്പെടുത്തുകയായിരുന്നു.

തിങ്കളാഴ്ച ഉച്ച 2.40ന്​ ഇംഫാലിൽനിന്ന്​ ഡൽഹിയിലേക്ക്​ പുറപ്പെടാനിരുന്ന വിമാനത്തിൽ യാത്ര ചെയ്യുന്നതിനാണ്​ ഷെരീഫ്​ വിമാനത്താവളത്തിലെത്തിയത്​. സുരക്ഷ പരിശോധനയിൽ അസ്വഭാവികമായി പെരുമാറിയ​തിനെ തുടർന്ന്​ സംശയം തോന്നിയ സുരക്ഷ ഉദ്യോഗസ്​ഥർ വിശദമായി പരിശോധനക്ക്​ വിധേയമാക്കുകയായിരുന്നു.

തുടർന്ന്​ എക്​സ്​റേയിൽ മലാശയത്തിനുള്ളിൽ സ്വ​ർ​ണം ഒളിപ്പിച്ചിരിക്കുന്നതായി കണ്ടെത്തി. 909.68 ഗ്രാം ഭാരമുള്ള നാല്​ പാക്കറ്റ്​ സ്വർണ പേസ്​റ്റാണ്​ കണ്ടെടുത്തത്​. തുടർന്ന്​ സി.ഐ.എസ്​.എഫിലേയും കസ്റ്റംസിലെയും മുതിർന്ന ഉദ്യോഗസ്​ഥരെ വിവരം അറിയിക്കുകയായിരുന്നു. തുടർ നടപടികൾക്കായി ഷെരീഫിനെ വിമാനത്താവള അധികൃതർ ഇവർക്ക്​ കൈമാറി.