രാത്രി കത്തിയുമായി കറങ്ങിനടന്ന് കുത്തിവീഴ്ത്തിയത് അഞ്ച് പേരെ; പ്രതിയെ പിടികൂടാനാവാതെ പൊലീസ്

ബംഗളൂരു: കത്തിയുമായി നഗരത്തിൽ കറങ്ങിനടന്ന് അഞ്ച് പേരെ കുത്തിവീഴ്ത്തിയ യുവാവിനായി ബംഗളുരു പൊലീസ് അന്വേഷണം ഊർജിതമാക്കി. ഇന്ദിരാനഗറിലാണ് സംഭവം.

ഇയാളുടെ ആക്രമണത്തിൽ പരിക്കേറ്റ അഞ്ചുപേരിൽ രണ്ട് പേരുടെ നില ഗുരുതരമാണ്.ജോഗുപാല്യ സ്വദേശിയായ കടംബ എന്ന 26കാരനാണ് സംഭവങ്ങൾക്ക് പിന്നിലെന്ന് പൊലീസ് കണ്ടെത്തിയിട്ടുണ്ട്. എന്നാൽ ഇയാളെ ഇതുവരെ പിടികൂടാൻ കഴിഞ്ഞിട്ടില്ല.

കഴിഞ്ഞ വർഷം മൊബൈൽ ഫോൺ മോഷണ കേസിൽ ഇയാളെ പൊലീസ് അറസ്റ്റ് ചെയ്തിരുന്നു. ജാമ്യത്തിലിറങ്ങിയ ശേഷം പിന്നീട് പൊലീസിന് ഇയാളെ കണ്ടെത്താൻ കഴിഞ്ഞിരുന്നില്ല. ഇയാളുടെ പിതാവും ക്രിമിനൽ പശ്ചാത്തലമുള്ള ആളാണെന്നും പൊലീസ് പറഞ്ഞു.

അക്രമിയെ ഉടൻ തന്നെ പിടികൂടുമെന്നും പരിഭ്രാന്തിയുടെ ആവശ്യമില്ലെന്നും പൊലീസ് അറിയിച്ചു.