കുറ്റകൃത്യപരിപാടികൾ ​പ്രചോദനമായി; കളിത്തോക്ക്​ ചൂണ്ടി കവർച്ച നടത്തിയ രണ്ടുപേർ അറസ്റ്റിൽ

ന്യൂഡൽഹി: കുറ്റകൃത്യപരിപാടികളിൽനിന്ന് ​പ്രചോദനം ഉൾക്കൊണ്ട്​ കവർച്ച പതിവാക്കിയ രണ്ടുപേർ അറസ്റ്റിൽ. മഴക്കോട്ടും മാസ്​കും ധരിച്ച്​ സ്​കൂട്ടറിലെത്തി കളിത്തോക്ക്​ ചൂണ്ടിയായിരുന്നു ഇവരുടെ മോഷണം.

ഡൽഹിയിലെ ജ്വല്ലറി ഷോപ്പുകളിൽ ഇവർ ഇത്തരത്തിൽ കവർച്ച നടത്തിയിരുന്നു. കൂടാതെ വിവിധ സ്​റ്റോറുകളിലും ഇവർ മോഷണം നടത്തിയിരുന്നു. വ്യാജ നമ്പർ പ്ലേറ്റ്​ പതിച്ച സ്​കൂട്ടറിലെത്തിയാണ്​ ഇവരുടെ മോഷണമെന്നും തെക്കൻ ഡൽഹി ഡി.സി.പി അതുൽ താക്കുർ പറഞ്ഞു.

അടുത്തിടെ ഇവരും ​േ​ഗ്രറ്റർ കൈലാഷ്​ പ്രദേശത്ത്​ മോഷണം നടത്തിയിരുന്നു. വെള്ള സ്​കൂട്ടറിലെത്തി മോഷണം നടത്തിയ ശേഷം കടന്നുകളയുകയായിരുന്നു. തുടർന്ന്​ കടയുടമ ​െപാലീസിൽ പരാതി നൽകുകയായിരുന്നു. വെള്ള സ്​കൂട്ടറിൽ സഞ്ചരിക്കുന്ന രണ്ടു യുവാക്കളെക്കുറിച്ച്​ അന്വേഷണം നടത്തിയെങ്കിലും യാതൊരു തുമ്പും കിട്ടിയിരുന്നില്ല.

പിന്നീട്​ സി.സി.ടി.വി ദൃശ്യങ്ങളിൽനിന്ന്​ പ്രതികളെ തിരിച്ചറിയാൻ ശ്രമിക്കുകയായിരുന്നു. ഇതോടെ ബിഹാർ സ്വദേശികളായ ധീരജും പങ്കജും പിടിയിലാകുകയായിരുന്നു. ഹരിയാനയിലെ പാനിപത്തിൽനിന്നാണ്​ ധീരജിനെ അറസ്റ്റ്​ ചെയ്​തത്​. പങ്കജ്​ യു.പിയിലെ നോയിഡയിൽനിന്നും.

ഇവരിൽനിന്ന്​ ഒരു കളിത്തോക്കും പൊലീസ്​ കണ്ടെടുത്തു. കുറ്റം നടത്താൻ ഉപയോഗിച്ച മഴക്കോട്ടും സ്​കൂട്ടറും പൊലീസ്​ കണ്ടുകെട്ടി. ഇവരിൽനിന്ന്​ മോഷണ മുതലും പൊലീസ്​ കണ്ടെടുത്തതായാണ്​ വിവരം. വിവിധ ഇടങ്ങളിൽ ഇവർ നേരത്തേ കവർച്ച നടത്തിയതായും ഇന്‍റർനെറ്റിലെ കുറ്റകൃത്യ പരിപാടികൾ കണ്ടാണ്​ തങ്ങൾ മോഷണത്തിനിറങ്ങിയതെന്നു​ം അവർ പൊലീസിൽ പറഞ്ഞു.