16കാരനൊപ്പം 12കാരി വീടുവിട്ടിറങ്ങി; ലവ്​ ജിഹാദ്​ ആരോപിച്ച്​ കൗമാരക്കാരന്​ ക്രൂരമർദനം

ലഖ്​നോ: മധ്യപ്രദേശിലെ ദേവാസിൽ ലവ്​ ജിഹാദ്​ ആരോപിച്ച്​ 16കാരന് ആൾക്കൂട്ടത്തിന്‍റെ​ ക്രൂരമർദനം. നാലുദിവസം മുമ്പാണ്​ സംഭവം. സംഭവത്തിന്‍റെ വിഡിയോ ദൃശ്യങ്ങൾ വൻതോതിൽ പ്രചരിപ്പിച്ചു.

ഉത്തർപ്രദേശ്​ സ്വദേശികളായ 16കാരനും 12കാരിയും ഒരാഴ്ച മുമ്പാണ്​ വീടുവിട്ടിറങ്ങിയത്​. ഇരുവരെയും കാണാതായതോടെ കുടുംബം പൊലീസിൽ പരാതി നൽകുകയായിരുന്നു. തുടർന്ന്​ നടത്തിയ പൊലീസ്​ അന്വേഷണത്തിൽ ദേവാസിൽനിന്ന്​ 17കിലോമീറ്റർ അകലെയുള്ള ബുൻസാരയിലെ ടോൾ ബൂത്തിന്​ സമീപം വെച്ച്​ ഇരുവരെയും ബസിൽ കണ്ടെത്തി.

എന്നാൽ, ബസിലായിരുന്ന ഇരുവരെയും പിടികൂടാൻ ശ്രമിക്കുന്നതിടെ ഒരു കൂട്ടം ആളുകൾ രണ്ടു കാറുകളിലായി ബസിന്​ സമീപമെത്തുകയായിരുന്നു. തുടർന്ന്​ ഇരുവരെയും പിടികൂടി 16കാനെ ക്രൂരനെ മർദിച്ചു. പൊലീസ്​ തടയാൻ ശ്രമിച്ചെങ്കിലും ആദ്യം പരാജയപ്പെടുകയായിരുന്നു. പിന്നീട്​ ആൾക്കൂട്ടത്തിൽനിന്ന്​ കുട്ടികളെ രക്ഷപ്പെടുത്തി സുരക്ഷിത കേന്ദ്രത്തിലേക്ക്​ മാറ്റി.

16കാരൻ മുസ്​ലിമാണെന്ന്​ തെറ്റിദ്ധരിച്ച്​ 'ലവ്​ ജിഹാദ്​' ആരോപിച്ചാണ്​ കുട്ടിയെ മർദിച്ചതെന്ന്​ പൊലീസ്​ പറഞ്ഞു. 'ലവ്​ ജിഹാദ്​ കേ​സാണെന്നാണ്​ അവർ കരുതിയത്. ഇരുവരും ഒരേ വിഭാഗത്തിൽനിന്നുള്ളവരാണെന്ന്​ ഞങ്ങൾ പറഞ്ഞിരുന്നു. എന്നാൽ അവർ കേൾക്കാൾ തയാറായില്ല' -പൊലീസ്​ പറഞ്ഞു.

പൊലീസ്​ ഇടപെട്ടില്ലെങ്കിൽ കുട്ട​ി​യുടെ ജീവൻ അപകടത്തിലാകുമായിരുന്നു. ഇരുവരെയും സുരക്ഷിതമായ സ്​ഥലത്തേക്ക്​ മാറ്റിയതായും പിന്നീട്​ യു.പി പൊലീസിന്​ കൈമാറിയതായും പൊലീസ്​ കൂട്ടിച്ചേർത്തു.

സംഭവത്തിൽ, വെള്ളിയാഴ്ച ദേവാസ്​ പൊലീസ്​ നാലുപേർക്കെതിരെയും അജ്ഞാതരായ 15 പേർക്കെതിരെയും കേസെടുത്തു. മർദനത്തിന്‍റെ വിഡിയോ പ്രചരിച്ചതോടെയാണ്​ പൊലീസ്​ കേസെടുത്തത്​. പ്രതികളെ പിടികൂടാൻ ഇതുവരെ പൊലീസിന്​ കഴിഞ്ഞിട്ടില്ല.