കുത്തേറ്റ്​ കിടക്കുന്ന നിലയിൽ സ്വത്​വാ; കൃഷ്ണചന്ദ്രൻ കത്തികൊണ്ട് സ്വയം കുത്തുന്നത്​ കണ്ടതായി ബന്ധു

കൊല്ലം: കൊട്ടിയം കോടാലിമുക്കിൽ ഇസ്രായേൽ സ്വദേശിനിയായ ഭാര്യയെ കഴുത്തറുത്ത് കൊലപ്പെടുത്തിയ ശേഷം വയോധികനായ ഭർത്താവ് കത്തികൊണ്ട് സ്വയം കുത്തി ആത്മഹത്യക്ക് ശ്രമിച്ച സംഭവത്തിൽ അന്വേഷണം തുടരുന്നു. ഗുരുതരമായി പരിക്കേറ്റ ഭർത്താവ് കൃഷ്ണചന്ദ്രനെ വിദഗ്​ധ ചികിത്സക്കായി തിരുവനന്തപുരം മെഡിക്കൽ കോളജ്​ ആശുപത്രിയിലേക്ക് മാറ്റിയിരിക്കുകയാണ്.

ഇസ്രായേൽ സ്വദേശിനി രാധ എന്ന സ്വത്​വാ ആണ് (36) ഇന്നലെ കൊല്ലപ്പെട്ടത്. ഇവരുടെ ഭർത്താവായ കൃഷ്ണചന്ദ്രനാണ്​ (75) ചികിത്സയിലുള്ളത്. വ്യാഴാഴ്ച ഉച്ചക്ക്​ മൂന്നരയോടെ ഡീസൻറുമുക്ക് കോടാലിമുക്കിന് തെക്ക്​ പൊതുവിതരണ കേന്ദ്രത്തിനു മുന്നിലുള്ള തിരുവാതിര വീട്ടിലായിരുന്നു സംഭവം.

ഇവിടെ വാടകക്ക്​ താമസിക്കുന്ന രവികുമാറിന്‍റെയും ബിന്ദുവിന്‍റെയും ഇളയച്ഛനാണ് കൃഷ്ണചന്ദ്രൻ. ഉത്തരാഖണ്ഡിൽ ദീർഘകാലമായി യോഗ അധ്യാപകനായിരുന്ന ഇദ്ദേഹം ഒരു വർഷം മുമ്പാണ് ആയുർവേദ ചികിത്സക്കായി ഇസ്രായേലി യുവതിക്കൊപ്പം ഇവിടെ എത്തിയത്.

വ്യാഴാഴ്ച മൂന്നരയോടെ ബന്ധുവീട്ടിൽ പോയശേഷം ബിന്ദു വീട്ടിലെത്തി കോളിങ്​ ബെൽ അടിച്ചെങ്കിലും മുന്നിലെ വാതിൽ തുറന്നില്ല. പിന്നിലെ വാതിൽ തുറന്ന് ഉള്ളിൽ കയറിയപ്പോഴാണ് സ്വത്​വാ കുത്തേറ്റ്​ കിടക്കുന്നത്​ കണ്ടത്. കൃഷ്ണചന്ദ്രൻ കത്തികൊണ്ട് സ്വയം വയറ്റിൽ കുത്തുന്നത്​ കണ്ടതായും ബിന്ദു പറയുന്നു. ഇവർ അയൽവാസിയുടെ സഹായത്തോടെ കൊട്ടിയം പൊലീസിനെ വിവരമറിയിച്ചു. പൊലീസ് എത്തി സ്വത്​വായെയും ഭർത്താവിനെയും ജില്ല ആശുപത്രിയിലെത്തിക്കുകയായിരുന്നു. ഡോക്ടർ മരണം സ്ഥിരീകരിച്ചതോടെ സ്വത്​വായുടെ മൃതദേഹം മോർച്ചറിയിലേക്ക് മാറ്റി.

16 വർഷമായി കൃഷ്ണചന്ദ്രനും സ്വത്​വായും ഒരുമിച്ചാണ് കഴിയുന്നത്. ഋഷികേശിൽ യോഗ അധ്യാപകനായിരിക്കെ കൃഷ്ണചന്ദ്രന്‍റെ ശിഷ്യയായിരുന്നു സ്വത്​വാ. പിന്നീട് വിവാഹിതരാവുകയായിരുന്നു. ആരോഗ്യപ്രശ്നങ്ങളെ തുടർന്ന് ഇരുവരും മരിക്കാനുള്ള തയാറെടുപ്പുകൾ നടത്തിയിരുന്നതായി കൃഷ്ണചന്ദ്രൻ പൊലീസിന് മൊഴിനൽകിയതായാണ് വിവരം.