16കാര​ിയെ ബലാത്സംഗം ചെയ്​ത കേസിൽ സ്വയം പ്രഖ്യാപിത ആൾദൈവവും ഭാര്യയും അറസ്റ്റിൽ

ചെന്നൈ: പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്​ത കേസിൽ സ്വയം പ്രഖ്യാപിത ആൾദൈവവും ഭാര്യയും അറസ്റ്റിൽ. പെൺകുട്ടിയെ ഗർഭഛിദ്രം നടത്താൻ നിർബന്ധിക്കുകയും നഗ്​ന ചിത്രങ്ങൾ സമൂഹമാധ്യമങ്ങളിലൂടെ പ്രചരിപ്പിക്കുമെന്ന്​ ഭീഷണിപ്പെടുത്തുകയും ചെയ്​തിരുന്നു. നഗരത്തിൽ ഷിർദിപുരം സർവ ശക്തി പീഠം സായി ബാബ കോവിൽ നടത്തുന്ന സത്യനാരായണൻ, ഭാര്യ പുഷ്​പലത എന്നിവരാണ്​ അറസ്റ്റിലായത്​.

നാലുവർഷം മുമ്പാണ്​ സംഭവങ്ങളുടെ തുടക്കം. 2016ൽ 16കാരിയായ പെൺകുട്ടിയെ ഭാര്യയുടെ സഹായത്തോടെ സത്യനാരായണൻ ബലാത്സംഗം ചെയ്യുകയായിരുന്നു.

'12ാം ക്ലാസിൽ പഠിക്കു​േമ്പാൾ മുത്തശ്ശിയുടെ വീട്ടിലാണ്​ ഞാൻ താമസിച്ചിരുന്നത്​. പതിവുപോലെ 2016 ഏപ്രിൽ 12നും ഞങ്ങൾ ക്ഷേത്രത്തിൽ പോയി. ഭസ്​മം വാങ്ങാൻ എന്നോട്​ ആവശ്യപ്പെട്ടു. ​ഞാൻ ക്ഷേത്രത്തിലെത്തിയപ്പോൾ പുഷ്​പലത എനിക്ക്​ ജ്യൂസ്​ കഴിക്കാൻ തന്നു. രണ്ടു മണിക്കൂറിന്​ ശേഷം ബോധം തെളിഞ്ഞപ്പോൾ നഗ്​നയായി ഞാൻ കട്ടിലിൽ കിടക്കുകയായിരുന്നു' -പെൺകുട്ടിയുടെ പരാതിയിൽ പറയുന്നു. സമീപത്ത്​ സത്യനാരായണനും ഉണ്ടായിരുന്നതായും പരാതിയിൽ പറയുന്നു.

ബലാത്സംഗത്തിന്​ ശേഷം​ നഗ്​നചിത്രം കാണിച്ച്​ ആരോടും പറയരുതെന്ന്​ ഇയാൾ ഭീഷണിപ്പെടുത്തി. പിന്നീട്​ പെൺകുട്ടിയു​ം കുടുംബവും സ്​ഥലം മാറി പോകുകയും 2018ൽ വിവാഹം കഴിക്കുകയും ചെയ്​തു.

2020 മാർച്ചിൽ പെൺകുട്ടിയുടെ ഭർത്താവ്​ വിദേശത്ത്​ ജോലിക്കായി പോയതോടെ സത്യനാരായണൻ വീണ്ടും പെൺകുട്ടിയെ ഭീഷണിപ്പെടുത്താൻ ആരംഭിച്ചു. ഭർത്താവ്​ വിദേശത്ത്​ പോയതോടെ തനിച്ചാണെന്ന്​ മനസിലാക്കിയ ​പ്രതി പെൺകുട്ടിയെ ഭീഷണിപ്പെടുത്താൻ ആരംഭിച്ചു. ഭർത്താവിന്​ നഗ്​ന ചിത്രങ്ങൾ അയച്ചുനൽകുമെന്നായിരുന്നു ഭീഷണി. തുടർന്ന്​ നിരവധി തവണ പ്രതി പെൺകുട്ടിയെ ബലാത്സംഗം ചെയ്​തതായും ​എഫ്​.ഐ.ആറിൽ പറയുന്നു.

2020 ജൂലൈയിൽ പെൺകുട്ടി ഗർഭിണിയായി. ഇതോടെ സത്യനാരായണനും ഭാര്യയും ഗർഭഛിദ്രത്തിന്​ പെൺകുട്ടിയെ നിർബന്ധിച്ചു. അതിനിടെ പെൺകുട്ടി ആത്മഹത്യക്കും ശ്രമിച്ചിരുന്നു. ഇൗ വർഷം ജനുവരിയിൽ പെൺകുട്ടി ഒരു കുഞ്ഞിന്​ ജന്മം നൽകി.

പെൺകുട്ടിയുടെ ഭർത്താവ്​ വിദേശത്തുനിന്നെത്തുകയും നവംബറിൽ വിദേശത്തേക്ക്​ മടങ്ങുകയും ചെയ്​തിരുന്നു. ഇതോടെ വീണ്ടും പെൺകുട്ടിയെ സത്യനാരായണൻ കാണാൻ ശ്രമിക്കുകയും ഭീഷണിപ്പെടുത്താൻ ആരംഭിക്കുകയും ചെയ്​തു. നഗ്​നചിത്രങ്ങൾ ഭർത്താവിന്​ അയച്ചുനൽകുമെന്നായിരുന്നു ഭീഷണി. ഇതോടെ പെൺകുട്ടി ഭർത്താവിനെ വിവരം അറിയിക്കുകയും നഗരത്തിലെ വനിത ​െപാലീസ്​ സ്​റ്റേഷനിൽ പരാതി നൽകുകയുമായിരുന്നു. പോക്​സോ അടക്കമുള്ള വകുപ്പുകൾ ചുമത്തി സത്യനാരായണനെയും ഭാര്യയെയും അറസ്റ്റ്​ ചെയ്യുകയും ജുഡീഷ്യൽ കസ്റ്റഡിയിൽ വിടുകയും ചെയ്​തു.