ഫാഷൻ ഗോൾഡ്​ തട്ടിപ്പ്​ കേസ്; കുറ്റപത്രം അടുത്തമാസം

കാസർകോട്​: ഫാഷൻ ഗോൾഡ്​ തട്ടിപ്പു കേസ് അന്വേഷണം അന്തിമഘട്ടത്തിലേക്ക്​. അന്വേഷണം പൂർത്തിയാക്കി അടുത്തമാസം കുറ്റപത്രം നൽകാൻ സാധിച്ചേക്കുമെന്ന്​ അന്വേഷണ സംഘം പറഞ്ഞു. തിരുവനന്തപുരം വിമാനത്താവളം വഴി നടന്ന സ്വർണം കടത്ത്​ സർക്കാറിനെ പ്രതിക്കൂട്ടിലാക്കിയ വിവാദത്തിനു പിന്നാലെ പ്രതിപക്ഷത്തെ പ്രതിക്കൂട്ടിൽ നിർത്തിയ കേസ്​ എന്ന പേരിൽ പ്രസിദ്ധിയാർജിച്ച കേസാണ്​ ചെറുവത്തൂർ ഫാഷൻ ഗോൾഡ്​ നിക്ഷേപ തട്ടിപ്പ്​ കേസ്​.

ഫാഷൻ ഗോൾഡ്​ കമ്പനി ചെയർമാൻ മുസ്​ലിം ലീഗ്​ നേതാവ്​ എം.സി. ഖമറുദ്ദീൻ എം.എൽ.എ പ്രതിയാവുകയും റിമാൻഡിലാവുകയും പിന്നാലെ എം.എൽ.എ സ്ഥാനം രാജിവെച്ച്​ ഉപതെരഞ്ഞെടുപ്പിനു വഴിവെക്കുകയും ചെയ്ത കേസ്​ ഏറെക്കാലമായി ഇഴഞ്ഞുനീങ്ങുകയായിരുന്നു. കേസിലെ നാലു പ്രതികളിൽ മൂന്നുപേർ അറസ്റ്റിലാണ്​. എം.സി. ഖമറുദ്ദീൻ, മാനേജിങ്​ ഡയറക്ടർ പൂക്കോയ തങ്ങൾ, ജനറൽ മാനേജർ ടി.കെ. സൈനുദ്ദീൻ, ജോലിക്കാരൻ ഹാരിസ്​ അബ്​ദുൽ ഖാദർ എന്നിവരാണ് അറസ്റ്റിലായത്​. തങ്ങളുടെ മകൻ ഇഷാം തങ്ങൾ വിദേശത്താണ്​. ഇയാളെ അറസ്റ്റ്​ ചെയ്യാൻ കഴിഞ്ഞിട്ടില്ല. ഇഷാമിനെ പിടികിട്ടാപ്പുള്ളിയായി പ്രഖ്യാപിച്ചായിരിക്കും കുറ്റപത്രം സമർപ്പിക്കുക.

കമ്പനി ഡയറക്ടർമാരെ മുഴുവൻ പ്രതികളാക്കാൻ ശ്രമം നടത്തിയിരുന്നു. ഇതിനുള്ള നിയമോപദേശത്തിന്​ സർക്കാർ മറുപടി നൽകിയില്ല. 150 കോടിയോളം രൂപയുടെ തട്ടിപ്പാണ് അരങ്ങേറിയതെന്നാണ്​ കണ്ടെത്തൽ. 40 സാക്ഷികളാണ്​ കേസിലുള്ളത്​. 700ലധികം ഓഹരി ഉടമകളുണ്ട്​. 20 ഡയറക്ടർമാരും. കേസിൽ സർക്കാറിനു താൽപര്യമില്ലാതായി. നാല്​ ഡിവൈ.എസ്​.പിമാർ പ്രത്യേക സംഘങ്ങളായി കേസിനു പിറകിലുണ്ട്​. ക്രൈംബ്രാഞ്ചിനു പുതിയ മേധാവി വന്നത്​ കേസിനു പൂട്ടിടാനുള്ള സാധ്യതയേറുമെന്നതും കുറ്റപത്രം സമർപ്പണത്തിന്‍റെ വേഗത വർധിപ്പിക്കും. ഫോറൻസിക്​ വിഭാഗത്തിലേക്ക്​ പരിശോധനക്കയച്ച രേഖകളിൽ തീരുമാനമുണ്ടാകുന്നതോടെ കേസന്വേഷണം അവസാനിക്കുമെന്നാണ്​ അന്വേഷണ വൃത്തങ്ങൾ നൽകുന്ന സൂചന.