കുട്ടികൾ തമ്മിലുണ്ടായ തർക്കം കുടുംബങ്ങൾ ഏറ്റെടുത്തു; 12കാരന്‍റെ നാക്ക്​ മുറിച്ചെടുത്തതായി പരാതി

ലഖ്​നോ: കുട്ടികൾ തമ്മിലുണ്ടായ തർക്കത്തെ തുടർന്ന്​ അയൽവാസികൾ 12കാരന്‍റെ നാക്ക്​ മുറിച്ചെടുത്തതായി പരാതി. ഉത്തർപ്രദേശിലെ ബുലന്ദേശ്വറിൽ ഖുർജ പ്രദേശത്താണ്​ സംഭവം.

അയൽവാസികളായ കുട്ടികൾ തമ്മിൽ ചെറിയ വഴക്കുണ്ടായിരുന്നു. പിന്നീട്​ അത്​ മാതാപിതാക്കൾ ഏറ്റെടുക്കുകയും അക്രമാസക്തമാകുയായിരുന്നുവെന്ന്​ ടൈംസ്​ ഓഫ്​ ഇന്ത്യ റി​േപ്പാർട്ട്​ ചെയ്യുന്നു.

വഴക്കിന്​ ശേഷം ഒരു കുടുംബം മറ്റൊരു കുടുംബത്തെ ശാരീരികമായി ആക്രമിക്കാൻ തുടങ്ങുകയായിരുന്നു. അതിനിടെ പുറത്ത്​ കളിച്ചുകൊണ്ടിരുന്ന 12കാരന്‍റെ നാവ്​ അറുത്തതായി കുടുംബം പറയുന്നു. മറ്റൊരാളുടെ തലക്കും അക്രമത്തിൽ പരിക്കേറ്റു.

താൻ ഒന്നും ചെയ്​തിട്ടില്ലെന്നും അയൽവാസികളായി കുൽദീപും സചിനും സുഹൃത്തുക്കളും ചേർന്ന്​ തന്നെ ആക്രമിക്കുകയായിരുന്നുവെന്ന്​ പരിക്കേറ്റ കുട്ടി പറഞ്ഞു. പുറത്ത്​ കളിക്കുന്നതിനിടെ മകന്‍റെ നാവ്​ അയൽവാസികൾ അറക്കുകയായിരുന്ന​ുവെന്ന്​ കുട്ടിയുടെ പിതാവ്​ പൊലീസിൽ നൽകിയ പരാതിയിൽ പറയുന്നു.

സംഭവത്തിൽ മൂന്നുപേർക്കെതിരെ പൊലീസ്​ കേസെടുത്തു. ഒരാളെ അറസ്റ്റ്​ ചെയ്​തിട്ടുണ്ട്​്​. മറ്റുള്ളവരെ പിടികൂടാൻ ശ്രമം ആരംഭിച്ചതായും പൊലീസ്​ പറഞ്ഞു.

നാവിന്​ പരിക്കേറ്റ കുട്ടി ചികിത്സയിലാണ്​. തലക്ക്​ പരിക്കേറ്റ കുട്ടി പ്രാഥമിക ചികിത്സ തേടിയശേഷം ആശുപ​ത്രി വിട്ടു.