പ്രഭാത സവാരിക്കിടയിൽ വയോധികയുടെ മാല കവർന്നു

ചെർപ്പുളശ്ശേരി: പ്രഭാത സവാരിക്കിറങ്ങിയ വയോധികയെ അക്രമിച്ച് മൂന്ന് പവനുള്ള മാല കവർന്നു. പുലിയാനംകുന്ന് താനിക്കൽ ശാന്തകുമാരി അമ്മക്ക് (74) നേരെയാണ് ആക്രമണം ഉണ്ടായത്. ചളവറചേറമ്പറ്റ കാവിനടുത്ത് ചുങ്കോണത്താലിനു സമീപം വ്യാഴാഴ്ച രാവിലെ ആറിനാണ് സംഭവം.

പിന്നിൽനിന്ന് അക്രമിച്ചശേഷം വായ പൊത്തിപ്പിടിച്ച് മാല കവരുകയായിരുന്നു. റോഡിന്റെ ഓരത്തുള്ള ഇടവഴിയിലേക്ക് ശാന്തകുമാരി അമ്മയെ തള്ളിയിട്ടു. ഇരുട്ടായതിനാൽ ആക്രമിയെ തിരിച്ചറിയാൻ കഴിഞ്ഞിട്ടില്ല.

രാവിലെ ക്ഷേത്രം വരെ നടക്കുകയും തൊഴുതിട്ട് തിരിച്ചുപോരുകയുമാണ് പതിവെന്ന് അവർ പറഞ്ഞു.ചെർപ്പുളശ്ശേരി പൊലീസ് സ്ഥലത്തെത്തി അന്വേഷണം ആരംഭിച്ചു. സമീപത്തെ സി.സി.ടി.വി ദൃശ്യങ്ങൾ പൊലീസ് പരിശോധിച്ചുവരികയാണ്.