കല്യാണ തിരക്കിനിടയിൽ 20-കാരിയുടെ മുടി മുറിച്ചതായി പരാതി, സംഭവം അറിഞ്ഞത് തിരിച്ച് വീട്ടിലെത്തിയപ്പോൾ

കല്യാണ തിരക്കിനിടയിൽ 20-കാരിയുടെ മുടി മുറിച്ചതായി പരാതി. കണ്ണൂർ കരിവെള്ളൂർ സ്വദേശിയായ ബിരുദവിദ്യാർഥിക്കാണ് മുടി നഷ്ടപ്പെട്ടത്. കഴിഞ്ഞ ദിവസം ആണൂരിലെ ഓഡിറ്റോറിയത്തിലായിരുന്നു സംഭവം. 20 സെന്റിമീറ്ററോളം നീളമുള്ള മുടിയാണ് മുറിച്ചു മാറ്റിയത്.

കല്യാണത്തിനുശേഷം വീട്ടിൽ തിരികെയെത്തിയപ്പോഴാണ് മുടി മുറിച്ചുമാറ്റിയതായി മനസിലാക്കുന്നത്. പെൺകുട്ടിയും മാതാവുമാണ് കല്യാണത്തിന് പ​​​ങ്കെടുത്തത്. മുടിമുറിച്ചത് മനസിലാക്കി പിതാവിനോടൊപ്പം തിരികെ ഓഡിറ്റോറിയത്തിലെത്തി അന്വേഷിച്ചപ്പോൾ, ഭക്ഷണശാലയുടെ അരികെ മുടി വീണുകിടക്കുന്നത് കണ്ടു.

രക്ഷിതാക്കൾ പയ്യന്നൂർ പൊലീസിൽ പരാതി നൽകി. മുടി മാഫിയയെക്കെുറിച്ച് പൊലീസ് ഗൗരവത്തോടെ അന്വേഷിക്കണമെന്ന് രക്ഷിതാവ് ആവശ്യപ്പെട്ടു. അറ്റകുറ്റപ്പണി നടക്കുന്നതിനാൽ സി.സി.ടി.വി. പ്രവർത്തിക്കുന്നില്ലെന്നാണ് ഓഡിറ്റോറിയം അധികൃതർ പറഞ്ഞത്.