നിർമാണ തൊഴിലാളി കൊല്ലപ്പെട്ടു; അഭിഭാഷകൻ അറസ്​റ്റിൽ

മുളങ്കുന്നത്തുകാവ് (തൃശൂർ): കോലഴി തിരൂരിൽ നിർമാണ തൊഴിലാളിയായ യുവാവ് കൊല്ലപ്പെട്ടു. സംഭവത്തിൽ അഭിഭാഷകനെ പൊലീസ്​ അറസ്​റ്റ്​ ചെയ്​തു.

തിരൂർ പണിക്കരപ്പടി വീട്ടിൽ മണികണ്ഠനാണ് (39) കൊല്ലപ്പെട്ടത്. തിരൂർ ശാശ്വതി നിലയം വീട്ടിൽ സജീഷാണ് ചുറ്റികകൊണ്ട് തലക്കടിച്ചും വയറിൽ ചവിട്ടിയും മണികണ്ഠനെ കൊലപ്പെടുത്തിയത്.

തൊഴിൽ സ്ഥലത്തുണ്ടായ തർക്കത്തെ തുടർന്ന് മണികണ്ഠനെ വീട്ടുടമ ആക്രമിക്കുകയായിരുന്നുവെന്നാണ്​ ആദ്യം ലഭിച്ച വിവരം. എന്നാൽ, മദ്യപാനത്തിനിടയിലുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് സമീപവാസികൾ പറയുന്നത്. വ്യാഴാഴ്ച ഉച്ചക്ക് മൂന്നോടെ തന്നെ ഇവർ തമ്മിൽ തർക്കം ആരംഭിച്ചിരുന്നുവത്രെ. വിയ്യൂർ പൊലീസ് സ്ഥലത്തെത്തിയാണ്​ സജീഷിനെ കസ്​റ്റഡിയിലെടുത്തത്​. കേസെടുത്ത് അന്വേഷണമാരംഭിച്ചു.