ബോംബ്​ സ്​ഫോടനം: ആദ്യശ്രമം പാളിയെന്ന്​ പ്രതി, സ്​ഫോടക വസ്തു സ്ഥാപിക്കുമ്പോൾ ഹാളിൽ മൂന്നുപേർ മാത്രം

കൊച്ചി: കളമശ്ശേരി സംറ കൺവെൻഷൻ സെന്‍ററിൽ ബോംബു​വെച്ച ശേഷം ആദ്യം നടത്തിയ സ്​ഫോടന ശ്രമം പാളിയെന്ന്​ പ്രതി ഡൊമിനിക്​ മാർട്ടിന്‍റെ ​മൊഴി. റിമോട്ട്​ ഉപയോഗിച്ചാൽ പൊട്ടിത്തെറിക്കുന്ന വിധം നിർമിച്ച ബോംബിന്‍റെ സ്വിച്ച് ഓണ്‍ ചെയ്യാന്‍ മറന്നുവെന്നാണ്​ ഇയാൾ ഉന്നത പൊലീസ് ഉദ്യോഗസ്ഥരുടെ നേതൃത്വത്തിൽ നടന്ന ചോദ്യം ചെയ്യലിൽ പറഞ്ഞത്​. പിന്നീട്​ രണ്ടാമത്​ വന്ന്​ സ്​ഫോടക വസ്തുവിലെ സ്വിച്ച്​ ഓൺ ചെയ്താണ്​ സ്​ഫോടനം നടത്തിയതെന്നും പ്രതി വെളിപ്പെടുത്തി.

യഹോവ സാക്ഷികൾ തിങ്ങിനിറഞ്ഞ ഹാളിന്‍റെ മധ്യഭാഗത്ത്​ വേദിയിൽനിന്ന്​ അഞ്ച്​ മീറ്റർ മാറിയാണ്​ ബോംബ്​ വെച്ചത്​. ഒന്നിനു പിറകെ ഒന്നായി മൂന്ന്​ പൊട്ടിത്തെറികളാണ്​ സംഭവിച്ചത്​. രാവിലെ 7.30 ഓടെയാണ്​ സംറ കണ്‍വെന്‍ഷന്‍ സെന്ററിലെത്തിയത്. ​തുടർന്ന്​ സ്​ഫോടക വസ്തു സ്ഥാപിക്കുമ്പോൾ ഹാളിലുണ്ടായിരുന്നത് വെറും മൂന്ന് പേര്‍ മാത്രമായിരുന്നു. പുറത്തെത്തിയ ശേഷം ആളുകള്‍ വന്നുതുടങ്ങുന്ന സമയത്ത് സ്ഫോടനം നടത്താൻ ശ്രമിച്ചപ്പോൾ ബോംബ് പൊട്ടിയില്ല.

പിഴവ് പറ്റിയെന്ന്​ തിരിച്ചറിഞ്ഞതോടെ വീണ്ടുമെത്തി സ്​ഫോടക വസ്തുവിലെ സ്വിച്ച് ഓണ്‍ ചെയ്തു. തുടർന്നാണ്​ പ്രാർഥനസമയത്ത് റിമോട്ട് കൺട്രോൾ ഉപയോഗിച്ച് സ്ഫോടനം നടത്തിയതെന്ന്​ മൊഴിയിൽ പറയുന്നു. കൃത്യമായ ആസൂത്രണത്തിനൊടുവിലാണ് മാർട്ടിൻ ഞായറാഴ്​ച പദ്ധതി നടപ്പാക്കിയതെന്നാണ് പൊലീസിന്റെ നി​ഗമനം. ശനിയാഴ്ചയും ഇയാൾ സെന്ററിലെത്തിയിരുന്നു. ഞായറാഴ്ച രാവിലെ 9.40ഓടെയുണ്ടായ സ്ഫോടനത്തിൽ മൂന്നുപേരാണ്​ മരിച്ചത്​. അറുപതോളം പേർക്ക്​ പൊള്ളലേറ്റിട്ടുണ്ട്​.