ബൈക്ക് കത്തിച്ച സംഭവം: പ്രതി അറസ്റ്റിൽ

അമ്പലപ്പുഴ: ചിട്ടിപിടിച്ച പണം തിരികെ നല്‍കാത്തതിനെ ചൊല്ലിയുള്ള തര്‍ക്കത്തില്‍ ബൈക്ക് കത്തിച്ചയാള്‍ അറസ്റ്റില്‍. ചിട്ടിനടത്തിപ്പുകാരനായ പുറക്കാട് ആനന്ദേശ്വരം ആലക്കാട് രാജീവ് (49)നെയാണ് അമ്പലപ്പുഴ പൊലീസ് അറസ്റ്റ് ചെയ്തത്.

പുറക്കാട് പഞ്ചായത്ത് തോട്ടപ്പള്ളി തണ്ടാശേരി വേണുവിന്‍റെ വീടിന്‍റെ മുന്നില്‍ പാര്‍ക്ക് ചെയ്തിരുന്ന ബൈക്കാണ് കത്തിച്ചത്. ശനിയാഴ്ചയായിരുന്നു സംഭവം. വേണു കൊടുക്കാനുള്ള ചിട്ടിപ്പണം ആവശ്യപ്പെട്ടാണ് രാജീവ് എത്തിയത്. പണത്തെചൊല്ലി ഇരുവരും തമ്മില്‍ തര്‍ക്കമുണ്ടായി. തുടര്‍ന്ന് വേണുവിന്‍റെ ബൈക്ക് കത്തിക്കുകയായിരുന്നെന്ന് പൊലീസ് പറഞ്ഞു.