അന്വേഷണത്തിന് വിളിച്ചു വരുത്തിയ ശേഷം പൊലീസുകാർക്ക് നേരെ നാട്ടുകാരുടെ ആക്രമണവും ബന്ദിയാക്കലും

കാൻപൂർ: ഗ്രാമവാസികൾ തമ്മിലുള്ള തർക്കം അന്വേഷിക്കാനെത്തിയ പൊലീസ് ഉദ്യോഗസ്ഥരെ നാട്ടുകാർ സംഘം ചേർന്ന് ആക്രമിച്ചു. ഉത്തർപ്രദേശിലെ കാൻപൂരിലാണ് സംഭവം. ഗ്രാമത്തിൽ തർക്കം നടക്കുന്നുണ്ടെന്ന വിവരത്തെ തുടർന്ന് അന്വേഷണം നടത്താനെത്തിയ പൊലീസുകാരെയാണ് നാട്ടുകാർ ആക്രമിക്കുകയും ബന്ദിയാക്കുകയും ചെയ്തത്.

ഭൗര-ഗുലാബ്പുർവ ഗ്രാമങ്ങളിൽ യുവാക്കൾ തമ്മിൽ തർക്കം നടന്നതായി പൊലീസിന് വിവരം ലഭിച്ചു. ഈ സംഭവത്തെ കുറിച്ച് അന്വേഷിക്കാനെത്തിയ ചേതക്, ഡയൽ 112 വിഭാഗങ്ങളിലെ പൊലീസ് ഉദ്യോഗസ്ഥരെയാണ് ഗ്രാമവാസികൾ സംഘം ചേർന്ന് ആക്രമിച്ചത്. മർദനത്തിൽ നിരവധി പേർക്ക് പരിക്കേറ്റു.

അക്രമസംഭവത്തിൽ 27 പേർക്കെതിരെ പൊലീസ് കേസെടുത്തു. ആക്രമണത്തിന് പുറമെ ഗ്രാമവാസികൾ പൊലീസുകാരെ ബന്ദിയാക്കിയെന്നും അധികൃതർ പറഞ്ഞു. വിവരം അറിഞ്ഞെത്തിയ രണ്ടാമത്തെ പൊലീസ് സംഘമാണ് ഉദ്യോഗസ്ഥരെ രക്ഷപ്പെടുത്തി ആശുപത്രിയിൽ എത്തിച്ചത്.