ഓട്ടോറിക്ഷകൾ കത്തിച്ച സംഭവം; ഒന്നാം പ്രതി പിടിയിൽ

നേമം: വീടിനു സമീപം പാർക്കു ചെയ്തിരുന്ന ബന്ധുക്കളുടെ ഓട്ടോറിക്ഷകൾ കത്തിച്ച സംഭവത്തിൽ ഒന്നാംപ്രതി പിടിയിൽ. വിളപ്പിൽശാല പൊലീസാണ് പ്രതിയെ പിടികൂടിയത്. പേയാട് സൈനബ മൻസിലിൽ നസീർ (36) ആണ് പിടിയിലായത്.

മാർച്ച് 24 രാത്രി 9.30നായിരുന്നു സംഭവം. നസീറും കൂട്ടാളിയും ചേർന്ന് വീടിന് സമീപം പാർക്ക് ചെയ്തിരുന്ന രണ്ട് ഓട്ടോറിക്ഷകൾക്ക് തീവെക്കുകയായിരുന്നു. വിളപ്പിൽ അലകുന്നം അജയ ഭവനിൽ രാജേഷ് സഹോദരൻ രമേഷ് എന്നിവരുടെ ഓട്ടോറിക്ഷകളാണ് കത്തിനശിച്ചത്.

മുമ്പ് നസീറും മറ്റു ചിലരും ചേർന്ന് ഉണ്ടായ സംഘട്ടനത്തിൽ രാജേഷ് ഇടപെട്ടതാണ് വിരോധത്തിന് കാരണമായത്. സംഭവത്തിനുശേഷം ചെന്നൈയിലേക്ക് കടന്ന പ്രതിയെ വിളപ്പിൽശാല സി.ഐ എൻ. സുരേഷ് കുമാറും സംഘവും ചേർന്നാണ് പിടികൂടിയത്. പ്രതിയെ കോടതിയിൽ ഹാജരാക്കി.