വാഹനം മാറ്റി നിർത്താൻ ആവശ്യപ്പെട്ടു; 56കാരനെ മൂന്നുപേർ മർദിച്ച് കൊലപ്പെടുത്തി

ഗുരുഗ്രാം: ഹരിയാനയിൽ 56കാരനെ മൂന്ന് പേർ ചേർന്ന് മർദിച്ച് കൊലപ്പെടുത്തി. ഗുരുഗ്രാമിലെ സർദാർ ബസാറിലാണ് സംഭവം. മൂൽ ചന്ദ് വർമ്മ എന്നയാണ് മരിച്ചതെന്ന് അധികൃതർ അറിയിച്ചു. റോഡിനു നടുക്കായി നിർത്തിയിട്ട ടെമ്പോ മാറ്റാൻ മൂൽ ചന്ദ് വർമ്മ ഡ്രൈവറോട് ആവശ്യപ്പെടുകയായിരുന്നെന്നും തുടർന്നുണ്ടായ തർക്കമാണ് കൊലപാതകത്തിലേക്ക് നയിച്ചതെന്നും പൊലീസ് അറിയിച്ചു. സംഭവത്തിൽ മുഖ്യപ്രതി ടെമ്പോ ഡ്രൈവർ അരവിന്ദ് കുമാറിനെ പൊലീസ് അറസ്റ്റ് ചെയ്തിട്ടുണ്ട്.

ഓഫിസിൽ നിന്ന് ഇരുചക്രവാഹനത്തിൽ വീട്ടിലേക്ക് മടങ്ങുകയായിരുന്നു മൂൽ ചന്ദ് വർമ്മ. സർദാർ ബസാറിനു സമീപം റോഡിന് നടുക്ക് നിർത്തിയിട്ട ടെമ്പോ അവിടെ നിന്നും മാറ്റാൻ ഇയാൾ ഡ്രൈവറോട് ആവശ്യപ്പെട്ടു. പിന്നാലെ ഡ്രൈവർ മൂൽ ചന്ദ് വർമ്മയോട് വാക്കുതർക്കത്തിലേർപ്പെടുകയായിരുന്നു.

തുടർന്ന് ഡ്രൈവറും മറ്റ് രണ്ട് പേരും ചേർന്ന് മൂൽ ചന്ദിനെ റോഡിലൂടെ വലിച്ചിഴക്കുകയും മർദിക്കുകയും ചെയ്തു. ഗുരുതരമായി പരിക്കേറ്റ മൂൽ ചന്ദിനെ ആശുപത്രിയിൽ പ്രവേശിപ്പിച്ചെങ്കിലും മരിക്കുകയായിരുന്നു. മകന്‍റെ പരാതിയിൽ കേസെടുത്തതായും അന്വേഷണം പുരോഗമിക്കുകയാണെന്നും പൊലീസ് അറിയിച്ചു.