മധ്യപ്രദേശിൽ 16കാരിയെ കൂട്ടബലാത്സംഗം ചെയ്​ത്​ ദൃശ്യങ്ങൾ മൊബൈലിൽ പകർത്തി

ഭോപാൽ: മധ്യപ്രദേശിൽ 16കാരിയെ കൂട്ടബലാത്സംഗത്തിനിരയാക്കി ദൃശ്യങ്ങൾ മൊബൈൽ ഫോണിൽ പകർത്തി. സെപ്​റ്റംബർ 12ന്​ ഭോപാലിലെ ഗുൻഗ പ്രദേശത്താണ്​ സംഭവം. റായ്​സൻ ജില്ലയിലെ സാഞ്ചി സ്വദേശിനിയായ 10ക്ലാസുകാരിയെയാണ്​ മൂന്ന്​പേർ ചേർന്ന്​ പീഡിപ്പിച്ചത്​.

റായ്​സൻ ജില്ലയിലെ മഹിള പൊലീസ്​ സ്​റ്റേഷനിലാണ്​ കേസ്​ രജിസ്റ്റർ ചെയ്യപ്പെട്ടത്​. കേസിലെ പ്രതികളെ ഇനിയും പിടികൂടാനായിട്ടില്ല. അസുഖബാധിതയായ സഹോദരിയെ സഹായിക്കാനായാണ്​ പെൺകുട്ടി ഗുൻഗയിൽ എത്തിയത്​. സംഭവം നടക്കു​േമ്പാൾ വീട്ടിൽ മറ്റാരും ഉണ്ടായിരുന്നില്ല. മതപരമായ സംഭാവന സ്വീകരിക്കാനായി എത്തിയതായിരുന്നു പ്രതികൾ. മൂന്ന്​ പ്രതികളെയും തിരിച്ചറിയാനാകുമെന്ന്​ പെൺകുട്ടി പരാതിയിൽ പറഞ്ഞു.

രണ്ടുപ്രതികൾ ബലാത്സംഗം ചെയ്​തപ്പോൾ മൂന്നാമൻ അത്​ മൊബൈലിൽ പകർത്തുകയായിരുന്നു​വെന്നാണ്​ പരാതി. പരാതി നൽകിയാൽ വിഡിയോ സാമൂഹിക മാധ്യമങ്ങളിൽ ​പ്രസിദ്ധീകരിക്കുമെന്ന്​ പ്രതികൾ ഭീഷണിപ്പെടുത്തിയതായി പൊലീസ്​ പറഞ്ഞു.

റായ്​സനിലെ സ്വന്തം വീട്ടിലെത്തിയ ശേഷം പെൺകുട്ടി സംഭവം പിതാവിനോട്​ വിവരിക്കുകയായിരുന്നു. ശേഷം ഇരുവരും സാഞ്ചിയിലെ പൊലീസ്​ സ്​റ്റേഷനിലെത്തി. ഇവിടെ നിന്നാണ്​ റായ്​സനിലെ മഹിള പൊലീസ്​ സ്​റ്റേഷനിൽ പരാതി നൽകാൻ നിർദേശം ലഭിച്ചത്​.