പ്ലസ് വൺ പരീക്ഷ റദ്ദാക്കണമെന്ന ഹരജി ഹൈകോടതി തള്ളി

കൊച്ചി: കോവിഡ്​ വ്യാപനം രൂക്ഷമായ സാഹചര്യത്തിൽ ഓഫ്​ ലൈൻ പ്ലസ് വൺ പരീക്ഷ റദ്ദാക്കണമെന്ന്​ ആവശ്യപ്പെട്ട് സമർപ്പിച്ച ഹരജി ഹൈകോടതി തള്ളി. സെപ്റ്റംബർ ആറു മുതൽ തീരുമാനിച്ച പരീക്ഷ തടയണമെന്നും​ സ്കൂൾ തലത്തിൽ പരീക്ഷ നടത്തി നിലവാരം വിലയിരുത്താൻ നിർദേശിക്കണമെന്നും ആവശ്യപ്പെട്ട്​ ആറ്​ വിദ്യാർഥികൾ നൽകിയ ഹരജിയാണ്​ ജസ്​റ്റിസ്​ രാജ വിജയരാഘവൻ തള്ളിയത്​.

കോവിഡും ലോക്ഡൗണും മൂലം ക്ലാസുകൾ ഫലപ്രദമായി നടന്നിട്ടില്ലെന്നും മൊബൈൽ ഫോൺ ഉൾപ്പെടെ ഡിജിറ്റൽ ഉപകരണങ്ങളും ഇൻറർനെറ്റ് സൗകര്യവും ഇല്ലാത്തതിനാൽ നിരവധി പേർക്ക് ക്ലാസിൽ പങ്കെടുക്കാനായില്ലെന്നുമായിരുന്നു ഹരജിക്കാരുടെ വാദം. എന്നാൽ, എസ്.എസ്.എൽ.സി, പ്ലസ് ടു പരീക്ഷകൾ ഫലപ്രദമായി നടത്തിയത്​ ചൂണ്ടിക്കാട്ടി സർക്കാർ ഇൗ വാദത്തെ എതിർത്തു.

അടുത്തിടെ നടത്തിയ എൻജിനീയറിങ്​ പ്രവേശന പരീക്ഷ ഒരു ലക്ഷം വിദ്യാർഥികളാണ് ഒാഫ്‌ ലൈനായി എഴുതിയത്. സാങ്കേതിക സർവകലാശാലയും ഒാഫ്‌ ലൈനായി പരീക്ഷ നടത്തി. കോവിഡ് മാനദണ്ഡങ്ങൾ പാലിച്ച് പരീക്ഷ നടത്താൻ കഴിയുമെന്നും വിശദീകരിച്ചു.

മേയ് 28നാണ് പ്ലസ്​ വൺ പരീക്ഷ നടത്തിപ്പിന്​ പൊതുവിദ്യാഭ്യാസ വകുപ്പ് വിജ്ഞാപനമിറക്കിയത്. നാലു ലക്ഷത്തിലേറെ വിദ്യാർഥികളാണ് പരീക്ഷ എഴുതുന്നത്. ഇതി​െൻറ ഒരുക്കവും പൂർത്തിയായി. ഇൗ ഘട്ടത്തിൽ കോടതി ഇടപെടുന്നത് അക്കാദമിക് ഷെഡ്യൂൾ തകിടം മറിക്കുമെന്നും വിദ്യാർഥികൾക്ക് ബുദ്ധിമുട്ട് ഉണ്ടാക്കുമെന്നും സർക്കാർ വാദിച്ചു. തുടർന്നാണ്​ ഹരജി തള്ളിയത്​.