മൂന്ന്​ വർഷമായിട്ടും ഒന്നാം സെമസ്റ്റർ പരീക്ഷ നടത്തിയില്ല; ബി.വോക് വിദ്യാർഥികളുടെ ഭാവി വെച്ച് പന്താടരുതെന്ന്​ കെ.എസ്‌.യു

തേഞ്ഞിപ്പലം: കോഴ്​സ്​ തുടങ്ങി മൂന്ന്​ വർഷമായിട്ടും ഒന്നാം സെമസ്റ്റർ പരീക്ഷ പോലും നടത്താത്ത കാലിക്കറ്റ്​ സർവകലാശാല ബി.വോക്​ വിദ്യാർഥികളുടെ ഭാവി വെച്ച്​ പന്താടരുതെന്ന്​ കെ.എസ്​.യു.

കാലിക്കറ്റ്‌ സർവകലാശാലക്ക് കീഴിൽ 2018 വർഷത്തിൽ തുടങ്ങിയ ബാച്ചിലർ ഓഫ് വൊക്കേഷണൽ എഡ്യൂക്കേഷൻ കോഴ്സിൽ അഡ്മിഷൻ നേടിയ വിദ്യാർഥികളാണ്​ പ്രയാസം നേരിടുന്നത്​. കോഴ്സ് മൂന്ന്​ വർഷം പൂർത്തിയായിട്ടും ബി. വോക് ഒപ്റ്റോമെട്രി ആൻഡ്​ ഒഫ്ത്താൽമോളജിക്കൽ ടെക്നിക്സ് വിഷയമായി പഠിക്കുന്നവരുടെ ഒന്നാം സെമസ്റ്റർ പരീക്ഷ പോലും നടന്നിട്ടില്ല. മറ്റു വിഷയങ്ങളിൽ പഠിക്കുന്നവരുടെ രണ്ട് സെമസ്റ്റർ പരീക്ഷകൾ നടന്നിട്ടുണ്ടെങ്കിലും ഫലം ഇതുവരെ പ്രസിദ്ധീകരിച്ചിട്ടില്ല.

ഇത്തരത്തിൽ ഒരു പ്രതിസന്ധി നിലനിൽക്കുന്നതിനാൽ സർവകലാശാലക്ക് കീഴിൽ ഈ കോഴ്സിൽ പഠനം നടത്തുന്ന ആയിരത്തോളം വിദ്യാർഥികളുടെ ഭാവി ആശങ്കയിലാണ്.

വിദ്യാർഥികളുടെ ഭാവി കണക്കിലെടുത്ത് എത്രയും പെട്ടെന്ന് അനുകൂല നടപടി സ്വീകരിക്കണമെന്നാവശ്യപെട്ട് കെ.എസ്‌.യു ജില്ലാ സെക്രട്ടറി അർജുൻ കറ്റയാട്ട് ഉന്നത വിദ്യാഭ്യാസ വകുപ്പ് മന്ത്രിക്കും കാലിക്കറ്റ്‌ സർവകലാശാല വൈസ് ചാൻസലർക്കും കത്ത് നൽകി.