എയിംസ്​ ബിരുദാനന്തര ബിരുദ പ്രവേശന പരീക്ഷ എഴുതാനാകാതെ കോവിഡ്​ പോരാളികൾ

ന്യൂഡൽഹി: കോവിഡിനോട്​ നേരിട്ട്​ പൊരുതുന്ന ജൂനിയർ ഡോക്​ടർമാർക്കും നഴ്​സുമാർക്കും ആൾ ഇന്ത്യ ഇൻസ്​റ്റിറ്റ്യൂട്ട്​ ഓഫ്​ മെഡിക്കൽ സയൻസസിലെ ബിരുദാനന്തര ബിരുദ പ്രവേശന പരീക്ഷ അവസരം നഷ്​ടമാകും. കോവിഡ്​ രോഗികളു​മായി സമ്പർക്കം പുലർത്തിയി​ട്ടില്ലെന്നും രോഗലക്ഷണങ്ങളില്ലെന്നും സത്യവാങ്​മൂലം എഴുതി നൽകിയാൽ മാത്രമേ പരീക്ഷ എഴുതാൻ കഴിയൂ. തെറ്റായ വിവരങ്ങൾ നൽകിയാൽ നിയമപരമായി നേരിടുമെന്നും സത്യവാങ്മൂലത്തിൽ പറയുന്നു. ഇതോടെ രാജ്യത്തെ 70 ശതമാനം പേർക്കും അവസരം നഷ്​ടമാകും. 

എയിംസ്​ ബിരുദാനന്തര ബിരുദ നഴ്​സിങ്​, എം.ഡി, എം.എസ്​, സ്​പെഷ്യാലിറ്റി ഡി.എം, എം.സി.എച്ച്​ ​കോഴ്​സുകളിൽ എല്ലാവർഷവും പ്രവേശന പരീക്ഷ നടത്തിവരുന്നുണ്ട്​. നിരവധി ജൂനിയർ ഡോക്​ടർമാരും ഇപ്പോൾ ജോലി ചെയ്യുന്നവരും രാജ്യത്തെ 150ഓളം സ​െൻററുകളിൽ പരീക്ഷ എഴുതിവരുന്നു​. എന്നാൽ കോവിഡ്​ 19 ൻെറ പശ്ചാത്തലത്തിൽ രോഗലക്ഷണമില്ലെന്നും കോവിഡ്​ രോഗികളുമായി സമ്പർക്കം പുലർത്തിയിട്ടില്ലെന്നും സത്യവാങ്​മൂലം നൽകിയാൽ മാത്രമേ പരീക്ഷ എഴുതാൻ കഴിയുവെന്ന്​ എയിംസ്​ പറയുന്നു. ഇക്കാര്യം​ ഒപ്പിട്ട്​ സാക്ഷ്യപ്പെടുത്തിയാൽ മാത്രമേ പരീക്ഷ എഴുതാകൂ. ഇതോടെ കോവിഡ്​ രോഗത്തിനെതിരെ മുൻനിരയിൽനിന്ന്​ പോരാടുന്ന നിരവധി പേർക്ക്​ ഈ വർഷം അവസരം നഷ്​ടമാകും. 

അതേസമയം ​പ്രത്യേക സാഹചര്യം കണക്കിലെടുത്ത്​ പ്രവേശന പരീക്ഷ മാറ്റിവെക്കണമെന്നാണ്​ വിദ്യാർഥികള​ുടെ ആവശ്യം. കൂടാതെ എയിംസ്​ പ്രവേശന പരീക്ഷ സ​െൻററുകൾ മിക്കവർക്കും അയൽ ജില്ലകളിലും അന്തർ സംസ്​ഥാനങ്ങളിലുമായിരിക്കും അനുവദിക്കുക. ഇൗ സാഹചര്യത്തിൽ പരീക്ഷ സ​െൻററുകളിൽ എത്തിപ്പെടാൻ കഴിയുക പ്രയാസമാണെന്നും ജൂനിയർ ഡോക്​ടർമാർ പറയുന്നു. നേപ്പാളിൽനിന്ന്​ 200ഓളം അപേക്ഷകൾ ലഭിച്ചിട്ടുണ്ട്​. അതിർത്തികൾ അടച്ചതിനാൽ ഇവർക്കും പരീക്ഷ എഴുതാൻ കഴിയാതെയാകും. കണ്ടെയ്​ൻമ​െൻറ്​ സോണുകളിലും ക്വാറൻറീനിൽ കഴിയുന്നവർക്കും അവസരം നഷ്​ടപ്പെടും. 

അതേസമയം കോവിഡ്​ കാലം കഴിയുന്നതുവരെ പരീക്ഷ മാറ്റിവെക്കൽ പ്രയോഗികമല്ലെന്നും ചിലപ്പോൾ ഒരു പാഠ്യവർഷം തന്നെ നഷ്​ടപ്പെ​ട്ടേക്കാമെന്നും എയിംസ്​ ഡയറക്​ടർ ഡോ. രൺദീപ്​ ​ഗുലേറിയ പറയുന്നു.