യുവശാസ്ത്രജ്ഞരാകാൻ ​​അവസരം; യോഗ്യത പ്ലസ്ടു

ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ബംഗളൂരു നടത്തുന്ന നാലുവർഷ ബാച്ചിലർ ഓഫ് സയൻസ് റിസർച് പ്രോഗ്രാം പ്രവേശനത്തിന് 15 മുതൽ അപേക്ഷിക്കാം. ഫീസ് 500 രൂപ. എസ്.സി, എസ്.ടി, പി.ഡബ്ല്യൂ.ഡി 250 മതി. വിജ്ഞാപനം https://bs-ug.iisc.ac.inൽ.

എട്ട് സെമസ്റ്ററുകളടങ്ങിയ കോഴ്സിൽ ബയോളജി, കെമിസ്ട്രി, എർത് ആൻഡ് എൻവയൺമെന്റൽ സയൻസ്, മെറ്റീരിയൽസ്, മാത്തമാറ്റിക്സ്, ഫിസിക്സ് എന്നിവ പ്രത്യേക പഠനവിഷയങ്ങളാണ്. ഒരു വർഷത്തെ റിസർച് പ്രോജക്ടുമുണ്ട്. 111 സീറ്റാണുള്ളത്. ഹോസ്റ്റൽ സൗകര്യം ലഭിക്കും. യോഗ്യത: ഫിസിക്സ്, കെമിസ്ട്രി, മാത്തമാറ്റിക്സ് മുഖ്യ വിഷയങ്ങളായി പഠിച്ച് 60 ശതമാനം മാർക്കിൽ പ്ലസ്ടു.

യോഗ്യത പരീക്ഷ എഴുതുന്നവർക്കും അപേക്ഷിക്കാം. പട്ടിക വിഭാഗക്കാർക്ക് മിനിമം പാസ് മതി. കിഷോർ​ വൈജ്ഞാനിക് പ്രോത്സാഹൻ യോജന, ജെ.ഇ.ഇ മെയിൻ, ജെ.ഇ.ഇ അഡ്വാൻസ്ഡ്, നീറ്റ് യു.ജി, ഐസർ ആപ്റ്റിറ്റ്യൂഡ് ടെസ്റ്റ് മെറിറ്റ് അടിസ്ഥാനത്തിലാണ് പ്രവേശനം.