ഉ​സ്ബ​കി​സ്താ​നിൽ പഠിക്കാം; ബിരുദധാരികൾക്ക് നിരവധി സ്കോളർഷിപ്പുകൾ

ഇന്ത്യൻ വിദ്യാർഥികൾക്ക് ഉപരിപഠനത്തിൽ അഞ്ച് സ്കോളർഷിപ്പുകൾ പ്രഖ്യാപിച്ചിരിക്കുകയാണ് ഉ​സ്ബ​കി​സ്താൻ. ചരിത്രപ്രസിദ്ധമായ സമർഖണ്ഡ് നഗരത്തിൽ സ്ഥിതി ചെയ്യുന്ന സിൽക്ക് റോഡ് ഇന്റർനാഷണൽ യൂനിവേഴ്സിറ്റി ഓഫ് ടൂറിസം ആൻഡ് കൾച്ചറൽ ഹെറിറ്റേജിൽ ബിരുദാനന്തര ബിരുദ പ്രോഗ്രാമുകൾക്കായാണ് സ്കോളർഷിപ്പ് പ്രഖ്യാപിച്ചിരിക്കുന്നത്.2025–26 അധ്യയന വർഷത്തേക്കാണ് സ്കോളർഷിപ്പുകൾ. 2025 ആഗസ്റ്റ് 1 വരെയാണ് അപേക്ഷ സമർപ്പിക്കേണ്ടത്.

എസ്‌.സി.‌ഒ (ഷാങ്ഹായ് സഹകരണ സംഘടന) രാജ്യങ്ങളുമായുള്ള വിദ്യാഭ്യാസ ബന്ധം ശക്തിപ്പെടുത്തുന്നതിനും അക്കാദമിക് മൊബിലിറ്റിയിലൂടെ സാംസ്കാരിക വിനിമയം പ്രോത്സാഹിപ്പിക്കുന്നതിനും ലക്ഷ്യമിട്ടുള്ളതാണ് ഈ സംരംഭം. ടൂറിസവും പൈതൃകവും അതിന്റെ കേന്ദ്രബിന്ദുവായി കണക്കാക്കി ഇംഗ്ലീഷിൽ നടത്തുന്ന ആഗോളതലത്തിൽ പ്രസക്തമായ പാഠ്യപദ്ധതിയാണിത്.

ടൂറിസം ആൻഡ് ഹോസ്പിറ്റാലിറ്റി, മ്യൂസിയം സ്റ്റഡീസ്, ആർക്കിയോളജി, മാനേജ്മെന്‍റ് എന്നീ കോഴ്സുകളിലാണ്

സ്കോളർഷിപ്പ് ലഭിക്കുന്നത്.

സ്കോളർഷിപ്പ് ആനുകൂല്യങ്ങൾ

• തെരഞ്ഞെടുക്കപ്പെടുന്നവർക്ക് അക്കാദമിക് ചെലവുകൾ
• എല്ലാ വർഷവും ഉ​സ്ബ​കി​സ്താ​നിലേക്കുള്ള യാത്രാ ചെലവ് (വിമാന നിരക്ക് (ഇക്കണോമി ക്ലാസ്))
• പൊതു ജീവിതച്ചെലവുകൾ താങ്ങാൻ പ്രതിമാസം 500 യുഎസ് ഡോളർ സ്റ്റൈപ്പന്റ്.
• താമസത്തിനായി പ്രതിമാസം 100 യുഎസ് ഡോളർ
• ഉ​സ്ബ​കി​സ്താ​നിലുടനീളമുള്ള ചരിത്ര നഗരങ്ങളിലേക്ക് വർഷത്തിൽ രണ്ടുതവണ സാംസ്കാരിക യാത്രകൾ, ഓരോ യാത്രയ്ക്കും 100 യുഎസ് ഡോളർ

ആർക്കെല്ലാം അപേക്ഷിക്കാം

പ്രസക്തമായ മേഖലകളിൽ പശ്ചാത്തലവും മികച്ച ഇംഗ്ലീഷ് ഭാഷാ വൈദഗ്ധ്യവുമുള്ള ഇന്ത്യൻ ബിരുദധാരികൾ അപേക്ഷിക്കാം. അപേക്ഷകർ ഇനിപ്പറയുന്ന രേഖകൾ നൽകണം:

• പാസ്‌പോർട്ട് അല്ലെങ്കിൽ ദേശീയ ഐഡി കാർഡ്
• ഡിഗ്രി സർട്ടിഫിക്കറ്റ്
• പാസ്‌പോർട്ട് സൈസ് ഫോട്ടോ (3x4 സെ.മീ)
• കരിക്കുലം വീറ്റ
• ഇംഗ്ലീഷ് ഭാഷാ പ്രാവീണ്യം തെളിയിക്കുന്ന തെളിവ് (ഐ.ഇ.എൽ.ടി.എസ് സ്കോർ 6.0, TOEFL iBT സ്കോർ 72, സി.എഫ്.എഫ്.ആർ ലെവൽ ബി2)

(ഇംഗ്ലീഷിൽ ബിരുദം പൂർത്തിയാക്കിയ അപേക്ഷകർക്ക് ഇത് ഒഴിവാക്കിയിരിക്കുന്നു)

'എസ്‌.സി.‌ഒ രാജ്യങ്ങളുടെ ടൂറിസത്തിന്റെ വികസനത്തിന് സംഭാവന നൽകൽ' എന്ന തലക്കെട്ടിൽ ഒന്നര പേജ് വരെ ദൈർഘ്യമുള്ള ഒരു ഉപന്യാസം. കൂടുതൽ വിവരങ്ങൾക്ക്, ഉദ്യോഗാർത്ഥികൾക്ക് സർവകലാശാലയുടെ ഔദ്യോഗിക വെബ്‌സൈറ്റ് univ-silkroad.uz സന്ദർശിക്കാവുന്നതാണ്.