12ാം ക്ലാസ്​ പരീക്ഷ ഒഴിവാക്കി യു.പിയും; തീരുമാനം സി.ബി.എസ്​.ഇക്ക്​ പിന്നാലെ

ലഖ്​നോ: സി.ബി.എസ്​.ഇ 12ാം ക്ലാസ്​ പരീക്ഷ ഒഴിവാക്കിയതിന്​ പിന്നാലെ 12ാം ക്ലാസ്​ പരീക്ഷ റദ്ദാക്കി ഉത്തർപ്രദേശും. സംസ്​ഥാനത്തെ കൊറോണ വൈറസ്​ വ്യാപന സാധ്യത കണക്കിലെടുത്താണ്​ തീര​ുമാനം.

സംസ്​ഥാന സിലബസിൽ പഠിക്കുന്ന 12ാം ക്ലാസ്​ വിദ്യാർഥികളുടെ പരീക്ഷ റദ്ദാക്കിയതായി ഉത്തർപ്രദേ​ശ്​ സെക്കൻഡറി എജൂക്കേഷൻ കൗൺസൽ അറിയിച്ചു.

പത്താംക്ലാസിലെയും 11ാം ക്ലാസിലെയും പ്രകടനത്തിന്‍റെ അടിസ്​ഥാനത്തിലായിരിക്കും വിദ്യാർഥികളെ വിലയിരുത്തുക. 12ാം ക്ലാസ്​ വിദ്യാർഥികൾക്കായി ഓരോ വിഷയത്തിലും 90 മിനിറ്റ്​ പരീക്ഷ ജൂലൈ രണ്ടാംവാരത്തിൽ നടത്താൻ വിദ്യാഭ്യാസ ബോർഡ്​ നേരത്തേ നിർദേശിച്ചിരുന്നു. എന്നാൽ അത്​ ഒഴിവാക്കിയാണ്​ പുതിയ തീരുമാനം.

ഉത്തർപ്രദേശി​ൽ ഈ വർഷം 26 ലക്ഷം വിദ്യാർഥികളാണ്​ 12ാം ക്ലാസ്​ പരീക്ഷക്കായി തയാറെടുത്തിരുന്നത്​.

10ാം ക്ലാസ്​ വിദ്യാർഥികളുടെ പരീക്ഷ സംസ്​ഥാനം നേരത്തേതന്നെ നിർത്തിവെച്ചിരുന്നു. പിന്നീട്​ 29 ലക്ഷം വിദ്യാർഥികളെ പരീക്ഷയില്ലാതെ ഉയർന്ന ഗ്രേഡി​േലക്ക്​ ഉയർത്താനും തീരുമാനമായിരുന്നു. കൂടാതെ ആറ്​, ഏഴ്​, എട്ട്​, ഒമ്പത്​, 11 ക്ലാസുകളിലെ വിദ്യാർഥികളെ പരീക്ഷയില്ലാതെ ഉന്നത ക്ലാസുകളിലേക്ക്​ ജയിപ്പിക്കാനും തീരുമാനിച്ചിരുന്നു.

ചൊവ്വാഴ്ച സെൻട്രൽ ബോർഡ്​ ഓഫ്​ സെക്കൻഡറി എജൂക്കേഷൻ 12ാം ക്ലാസ്​ പരീക്ഷ ഒഴിവാക്കിയതായി യു.പി.എസ്​.ഇ.സി അറിയിച്ചിരുന്നു.