നീറ്റ്​ സ്​കോറനുസരിച്ചുള്ള സംസ്ഥാന റാങ്ക്​ പട്ടിക 20 ദിവസത്തിനകം

തിരുവനന്തപുരം: കേരളത്തിലെ പ്രവേശന നടപടികൾക്കായി നീറ്റ്​ സ്​കോർ അടിസ്ഥാനപ്പെടുത്തിയുള്ള സംസ്ഥാന റാങ്ക്​ പട്ടിക 15- 20 ദിവസത്തിനകം പ്രസിദ്ധീകരിക്കും. ഇതിനായി നീറ്റ്​ പരീക്ഷ നടത്തുന്ന നാഷനൽ ടെസ്​റ്റിങ്​ ഏജൻസിയിൽനിന്ന്​ ​ കേരളത്തിൽനിന്ന്​ യോഗ്യത നേടിയ കുട്ടികളുടെ വിവരം പ്രവേശന പരീക്ഷ കമീഷണറേറ്റ്​ ശേഖരിക്കും.

ഇതിനുശേഷം വിദ്യാർഥികൾക്ക്​ നീറ്റ്​ മാർക്ക്​ വെബ്​സൈറ്റ്​ വഴി സമർപ്പിക്കാനുള്ള അവസരം നൽകും. ഇതുകൂടി പരിഗണിച്ചായിരിക്കും സംസ്ഥാന റാങ്ക്​ പട്ടിക തയാറാക്കുക. സർക്കാർ മെഡിക്കൽ കോളജുകളിലെ 85 ശതമാനം സീറ്റുകളിലേക്കും സ്വകാര്യ സ്വാശ്രയ കോളജുകളിലെ മുഴുവൻ സീറ്റുകളിലേക്കും സംസ്ഥാന റാങ്ക്​ പട്ടികയിൽ നിന്നായിരിക്കും പ്രവേശനം.

15 ശതമാനം അഖിലേന്ത്യ ക്വോട്ടയിൽ കേന്ദ്ര ആരോഗ്യമന്ത്രാലയത്തിന്​ കീഴിലുള്ള മെഡിക്കൽ കൗൺസലിങ്​ കമ്മിറ്റിയാണ്​ പ്രവേശന നടപടികൾ നടത്തുക.

നീറ്റ്​ ഫലം പ്രസിദ്ധീകരിച്ചു

ന്യൂഡൽഹി: മെഡിക്കൽ കോഴ്​സുകളിലേക്കുള്ള ദേശീയ യോഗ്യത പ്രവേശന പരീക്ഷ (നീറ്റ്​) ഫലം പ്രസിദ്ധീകരിച്ചു. മലയാളിയായ കാർത്തിക ജി. നായർ, തെലങ്കാനയിലെ മൃണാൾ കു​റ്റേരി, ഡൽഹിയിലെ തൻമയി ഗുപ്​ത എന്നിവർ മുഴുവൻ മാർക്കും നേടി ഒന്നാം റാങ്ക്​ പങ്കിട്ടു.

കാർത്തിക മഹാരാഷ്​ട്രയിലാണ്​ പരീക്ഷ എഴുതിയത്​. കഴിഞ്ഞ സെപ്​റ്റംബർ 12ന്​ നടന്ന നീറ്റിൽ 15.44 ലക്ഷം വിദ്യാർഥികളാണ്​ പരീക്ഷ എഴുതിയത്​. 15 വിദ്യാർഥികളുടെ ഫലം തടഞ്ഞുവെച്ചു. 8,70074 പേർ യോഗ്യത നേടി. കേരളത്തിൽ പരീക്ഷ എഴുതിയവരിൽ ആലപ്പുഴ മാവേലിക്കര സ്വദേശി ഗൗരിശങ്കറാണ്​ ഒന്നാമത്​. അഖിലേന്ത്യാ തലത്തിൽ 17 ാം റാങ്കുകാരനാണ്​ ഗൗരി.

neet.nta.nic.in എന്ന സൈറ്റിൽ ഫലം ലഭിക്കും. ഔദ്യോഗിക വെബ്സൈറ്റിൽനിന്ന് ആപ്ലിക്കേഷൻ നമ്പരും ജനന തീയതിയും നൽകി ഫലം ഡൗൺലോഡ് ചെയ്യാം. ദേശീയ തലത്തിലെ ഉയർന്ന റാങ്കുകാരുടെ വിവരങ്ങൾ നാഷനൽ ടെസ്റ്റിങ് ഏജൻസി പുറത്തുവിടും.