സാങ്കേതിക സർവകലാശാല: ഓംബുഡ്സ്മാനെ നിയമിക്കണമെന്ന് ലോകായുക്ത

തിരുവനന്തപുരം: എ.പി.ജെ. അബ്ദുൽ കലാം സാങ്കേതിക സർവകലാശാലയിൽ (കെ.ടി.യു) ഓംബുഡ്സ്മാനെ നിയമിക്കണമെന്ന് ലോകായുക്ത. യു.ജി.സി ചട്ടപ്രകാരം പരാതി പരിഹാരത്തിന് ഓംബുഡ്സ്മാനെ നിയമിക്കണമെന്നും ഇക്കാര്യത്തിൽ സർവകലാശാലയുടേത്​ ഗുരുതരവീഴ്ചയാണെന്നും ലോകായുക്ത ഉത്തരവില്‍ വ്യക്തമാക്കി. ജസ്റ്റിസ് സിറിയക് ജോസഫിന്റേതാണ് ഉത്തരവ്. ആറ് മാസത്തിനുള്ളിൽ ഓംബുഡ്​സ്മാൻ നിയമനം നടത്തണമെന്നും ഉത്തരവില്‍ നിർദേശിച്ചു.

2014ൽ ആരംഭിച്ച സർവകലാശാലയിൽ ഇതുവരെ ഇത്തരം സംവിധാനം ഏർപ്പെടുത്താത്തത് അത്ഭുതപ്പെടുത്തുന്നെന്ന പരാമർശമാണ്​ ലോകായുക്ത നടത്തിയത്​. അജയ് പി സമർപ്പിച്ച സ്വകാര്യ ഹരജിയിലാണ്​ ഉത്തരവ്​. സാ​​​ങ്കേതിക സർവകലാശാലയുമായി ബന്ധപ്പെട്ട നിലവിലെ​ വിവാദങ്ങൾ നിലനിൽക്കെയാണ്​ ലോകായുക്തയുടെയും ഇടപെടലുണ്ടായത്​.

നിയമനം യു.ജി.സി ചട്ടപ്രകാരമല്ലെന്ന് കാട്ടി സാങ്കേതിക സർവകലാശാല വൈസ് ചാൻസലര്‍ നിയമനം സുപ്രീംകോടതി റദ്ദാക്കിയിരുന്നു. ഡോ. രാജശ്രീ എം.എസിനെ നിയമിച്ച നടപടിയാണ് സുപ്രീംകോടതി റദ്ദാക്കിയത്. പിന്നാലെ, താൽക്കാലിക വൈസ് ചാൻസലറായി ഡോ. സി.സി. തോമസിനെ ഗവര്‍ണര്‍ നിയമിക്കുകയും ചെയ്തു. ഈ നടപടി ചോദ്യം ചെയ്ത് സർക്കാർ സമർപ്പിച്ച ഹരജിയില്‍ ഇടക്കാല ഉത്തരവും സ്റ്റേയും ഇല്ലെന്ന് ഹൈകോടതി കഴിഞ്ഞദിവസമാണ്​ വ്യക്തമാക്കിയത്​. ഓംബുഡ്​സ്മാൻ സംവിധാനമുണ്ടായിരുന്നെങ്കിൽ സർവകലാശാലയിൽ അനാവശ്യ വിവാദങ്ങൾ ഉണ്ടാകുമായിരുന്നി​​ല്ലെന്ന നിരീക്ഷണമാണ്​ ലോകായുക്ത നടത്തിയത്​.