ഓപൺ സർവകലാശാലയിൽ അധ്യാപക നിയമനം പൂർത്തീകരിക്കാൻ നടപടി -മന്ത്രി

തിരുവനന്തപുരം: ശ്രീനാരായണ ഗുരു ഓപണ്‍ സർവകലാശാലയിലെ അധ്യാപക നിയമന നടപടികൾ പൂര്‍ത്തീകരിച്ചുവരികയാണെന്ന് മന്ത്രി ​ഡോ. ആർ. ബിന്ദു. സർവകലാശാലയിൽ അധ്യാപക നിയമനങ്ങൾ നടക്കുന്നില്ലെന്ന പരാതികളെക്കുറിച്ച്​ പ്രതികരിക്കുകയായിരുന്നു അവർ.

വിദ്യാർഥി പ്രവേശനവും നടന്നുവരുന്നുണ്ട്​. സര്‍വകലാശാല വിപുലീകരണത്തിലൂടെ ലക്ഷ്യമിടുന്നത് ​ഗുണമേന്മയുള്ള വിദൂരവിദ്യാഭ്യാസം ഉറപ്പാക്കലാണ്. സർവകലാശാല നടത്തുന്നത് മികച്ച പ്രവർത്തനമാണ്​. കോളജുകളുടെ സമയം വര്‍ധിപ്പിക്കുന്നതുമായി ബന്ധപ്പെട്ട ചര്‍ച്ചകള്‍ നടന്നുവരികയാണ്.

തിരുവനന്തപുരം സി.ഇ.ടിയിലെ പുതുക്കിയ സമയക്രമം വിദ്യാർഥികളുടെ ഉന്നമനത്തിന് വേണ്ടിയുള്ള തീരുമാനമാണ്. സര്‍വകലാശാല നിയമഭേദ​ഗതി വിഷയവും വി.സി നിയമന വിഷയങ്ങളും പാതയോരത്തുനിന്ന് വിശദീകരിക്കാൻ ബുദ്ധിമുട്ടുണ്ടെന്നും മന്ത്രി മാധ്യമങ്ങളോട് പറഞ്ഞു.