സിംബയോസിസ് ലോ സ്കൂളിൽ; ബി.എ എൽ.എൽ.ബി, ബി.ബി.എ എൽ.എൽ.ബി, എൽഎൽ.എം

നാഗ്പൂരിലെ സിംബയോസിസ് ലോ സ്കൂളിൽ നിയമപഠനത്തിന് അവസരം. പഞ്ചവത്സര റെഗുലർ ബി.എ.എൽഎൽ.ബി, ബി.ബി.എ.എൽഎൽ.ബി, എൽഎൽ.എം കോഴ്സുകളിലാണ് പ്ര​വേശനം. വിദ്യാർഥികൾക്ക് കാമ്പസിൽ താമസസൗകര്യമുണ്ട്. നൈപുണ്യാധിഷ്ഠിത നിയമവിദ്യാഭ്യാസമാണ് ഇവിടത്തെ പ്രത്യേകത. വിദേശ സർവകലാശാലകളുമായി സ്റ്റുഡന്റ് എക്സ്ചേഞ്ച് പ്രോമിലും പ​ങ്കെടുക്കാം.

പ്ലസ് ടു പരീക്ഷക്ക് 45 ശതമാനം മാർക്ക്/തത്തുല്യ ഗ്രേഡ് മതി. 2025 ഡിസംബർ 20 ശനിയാഴ്ച നടത്തുന്ന ഒന്നാമത്തെയും ഡിസംബർ 28 ഞായറാഴ്ച നടത്തുന്ന രണ്ടാമത്തെയും സിംബയോസിസ് ലോ അഡ്മിഷൻ ടെസ്റ്റിൽ (സ്ലാറ്റ്) പ​ങ്കെടുക്കുന്നതിന് ഓൺലൈനിൽ നവംബർ 30നകം രജിസ്റ്റർ ചെയ്യാവുന്നതാണ്. ഏകവർഷ എൽഎൽ.എം പ്രോഗ്രാമിൽ അൾട്ടർനേറ്റീവ് ഡിസ്പ്യൂട്ട് സെലൂഷൻ, ബിസിനസ് ആൻഡ് കോർപറേറ്റ് ലോ, ക്രിമിനൽ ആൻഡ് സെക്യൂരിറ്റി ലോ എന്നിവ സ്​പെഷലൈസേഷനുകളാണ്. 10 സീറ്റുകൾ വീതം 50 ശതമാനം മാർക്കിൽ (എസ്.സി/എസ്.ടി 45 ശതമാനം) കുറയാതെ നിയമബിരുദമുള്ളവർക്ക് അപേക്ഷിക്കാം. സിംബയോസിസ് അഖിലേന്ത്യാ അഡ്മിഷൻ ടെസ്റ്റ് ഡിസംബർ 20 ഞായറാഴ്ച. ഓൺലൈനിൽ നവംബർ 30 വരെ അപേക്ഷിക്കാം.

പ്രവേശന വിജ്ഞാപനം, പ്രോസ്​പെക്ടസ് www.slsnagpur.edu.inൽനിന്ന് ഡൗൺലോഡ് ചെയ്യാം. അന്വേഷണങ്ങൾക്ക് ഫോൺ: 0712-6192200/10/12.