ഒന്നാംക്ലാസിലേക്ക്​ പ്രവേശനപരീക്ഷ നടത്തിയാൽ വിദ്യാലയങ്ങളുടെ അംഗീകാരം റദ്ദാക്കും -മന്ത്രി വി. ശിവൻകുട്ടി

ആലപ്പുഴ: ഒന്നാം ക്ലാസിൽ ചേരാൻ കുട്ടികൾക്കായി പ്രവേശനപരീക്ഷ നടത്തുന്ന വിദ്യാലയങ്ങളു​​ടെ അംഗീകാരം റദ്ദാക്കുമെന്ന്​ മന്ത്രി വി. ശിവൻകുട്ടി. സംസ്ഥാന സ്​കൂൾ പ്രവേശനോത്സവം സ്വാഗതസംഘം രൂപവത്​കരണയോഗത്തിന്​ മുന്നോടിയായി ആലപ്പുഴ കലവൂർ ഗവ. ഹയർസെക്കൻഡറി സ്കൂളിൽ നടത്തിയ വാർത്തസമ്മേളനത്തിൽ സംസാരിക്കുകയായിരുന്നു അദ്ദേഹം.

ചില സ്കൂളുകളിൽ ഇത്തരം പരീക്ഷ നടത്തുന്നതായി ശ്രദ്ധയിൽപെട്ടിട്ടുണ്ട്​. അത്​ ഒരുകാരണവശാലും അംഗീകരിക്കില്ല. പ്ലസ്​വൺ അഡ്​മിഷന്‍റെ കാര്യത്തിലും ക്രമക്കേട്​ അനുവദിക്കില്ല. ഇത്തരം കാര്യങ്ങൾ ശ്രദ്ധയിൽപെട്ടാൽ കർശന നടപടിയുണ്ടാകും. മാനേജ്​മെന്‍റ്​ സീറ്റുകളുടെ പേരിൽ ചില അൺഎയ്​ഡഡ്​ സ്ഥാപനങ്ങൾ എസ്​.എസ്​.എൽ.സി ഫലം പുറത്തുവരുന്നതിന്​ മുമ്പേ അഡ്​മിഷൻ പൂർത്തിയാക്കി.

പ്ലസ്​വൺ പ്രവേശനം ആഗ്രഹിക്കുന്ന എല്ലാ വിദ്യാർഥികൾക്കും സീറ്റ്​ കിട്ടും. മലപ്പുറത്ത്​ ഉൾപ്പെടെ ഇത്​ സാധ്യമാകും. പി.ടി.എ ഫണ്ടായി ചെറിയതുക വാങ്ങാൻ സർക്കാർ ഉത്തരവുണ്ട്​. അത്​ ലംഘിച്ച്​ ചില സ്കൂളുകളിൽ 5,000 മുതൽ 10,000 രൂപവരെ വാങ്ങുന്നുണ്ട്​. രക്ഷകർത്താക്കൾ ഒരുകാരണവശാലും ആ പണം നൽകരുത്​. അതിന്‍റെ പേരിൽ ഒരുകുട്ടിയുടെയും അഡ്​മിഷൻ തടഞ്ഞു​വെക്കില്ല -മന്ത്രി അറിയിച്ചു.