വിദ്യാർഥികളുടെ ആവശ്യം പരിഗണിക്കില്ല; നീറ്റ്​ പരീക്ഷ മാറ്റില്ലെന്ന്​ നാഷണൽ ടെസ്​റ്റിങ്​ ഏജൻസി

ന്യൂഡൽഹി: മെഡിക്കൽ എൻട്രൻസ്​ പരീക്ഷയായ നീറ്റ്​ നേരത്തെ നിശ്​ചയിച്ച തീയതിയിൽ തന്നെ നടക്കുമെന്ന്​ നാഷണൽ ടെസ്​റ്റിങ്​ ഏജൻസി. വിദ്യാർഥികളുടെ ആവശ്യം പരിഗണിച്ച്​ പരീക്ഷ മാറ്റില്ലെന്നാണ്​ എൻ.ടി.എ അറിയിച്ചിരിക്കുന്നത്​. സെപ്​റ്റംബർ 12ന്​ ത​ന്നെ പരീക്ഷ നടത്തുമെന്ന്​ ഏജൻസി വ്യക്​തമാക്കി.

നീറ്റ്​ പരീക്ഷ സി.ബി.എസ്​.ഇ ബോർഡ്​ പരീക്ഷകൾക്ക്​ തടസമാവില്ലെന്ന്​ എൻ.ടി.എ ഡയറക്​ടർ ജനറൽ വിനീത്​ ജോഷി പറഞ്ഞു. നീറ്റ്​ പരീക്ഷാ ശ്രമങ്ങളുടെ എണ്ണം വർധിപ്പിക്കാൻ നിലവിൽ പദ്ധതിയില്ലെന്നും അദ്ദേഹം കൂട്ടിച്ചേർത്തു. നീറ്റ്​ തീയതി ഇപ്പോൾ മാറ്റിയാൽ അത്​ പരീക്ഷ രണ്ട്​ മാസത്തോളം വൈകുന്നതിന്​ ഇടയാക്കുമെന്ന്​ നേരത്തെ ഉദ്യോഗസ്ഥർ പ്രതികരിച്ചിരുന്നു. ഇതിന്​ പിന്നാലെയാണ്​ പരീക്ഷാ തീയതി മാറ്റില്ലെന്ന്​ എൻ.ടി.എ ഔദ്യോഗികമായി തന്നെ അറിയിച്ചിരിക്കുന്നത്​​.

നീറ്റ്​ പരീക്ഷ നടക്കുന്ന ആഴ്​ചയിൽ തന്നെയാണ്​ സി.ബി.എസ്​.ഇയുടെ ഇംപ്രൂവ്​മെൻറ്​ പരീക്ഷകളും നടക്കുന്നത്​. അതുകൊണ്ട്​ നീറ്റ്​ മാറ്റണമെന്നായിരുന്നു വിദ്യാർഥികളുടെ ആവശ്യം. സെപ്​റ്റംബർ ആറാം തീയതി സി.ബി.എസ്​.ഇ ബയോളജി​, ഒമ്പതാം തീയതി ഫിസിക്​സ്​ എന്നീ വിഷയങ്ങളുടെ ഇംപ്രൂവ്​മെൻറ്​ പരീക്ഷകൾ നടക്കുന്നുണ്ട്​. എന്നാൽ, നീറ്റ്​ ഈ പരീക്ഷകൾക്ക്​ തടസം സൃഷ്​ടിക്കില്ലെന്നാണ്​ എൻ.ടി.എ ഇപ്പോൾ വ്യക്​തമാക്കുന്നത്​.