ട്യൂഷൻ ഫീസ്​ 30 ശതമാനം കുറക്കണം, മറ്റ്​ ഫീസുകൾ ഈടാക്കാനും പാടില്ല; സ്വകാര്യ സ്കൂളുകളോട്​ കർണാടക സർക്കാർ

ബെംഗളൂരു: സംസ്ഥാനത്തിലെ എല്ലാ സ്വകാര്യ സ്​കൂളുകളോടും ട്യൂഷൻ ഫീസ്​ 30 ശതമാനം കുറക്കാൻ ഉത്തരവിട്ട്​ കർണാടക സർക്കാർ. കോവിഡ്​ മഹാമാരിയെ തുടർന്നാണ്​ നടപടി. സെൻറർ-സ്​റ്റേറ്റ്​ സിലബസുകൾ​ പിന്തുടരുന്ന എല്ലാ സ്വകാര്യ സ്കൂളുകളോടുമാണ്​ 2020-21 അധ്യയന വർഷത്തിൽ ട്യൂഷൻ ഫീസ്​ കുറക്കാൻ നിർദേശിച്ചിരിക്കുന്നത്​. ​മാതാപിതാക്കൾ ഇതിനകം തന്നെ മുഴുവൻ ഫീസും അടച്ചിട്ടുണ്ടെങ്കിൽ, അടുത്ത വർഷത്തേക്കുള്ള ഫീസിൽ അധിക തുക സ്കൂൾ മാനേജുമെൻറുകൾ കുറക്കണമെന്നും സർക്കാർ വ്യക്തമാക്കി.

ട്യൂഷൻ ഫീസ് കൂടാതെ വികസന ഫീസോ മറ്റ് ഫീസുകളോ ഇൗ അധ്യയന വർഷത്തിൽ ഈടാക്കാൻ പാടില്ലെന്നും സർക്കാർ അറിയിച്ചിട്ടുണ്ട്​. ഫീസുമായി ബന്ധപ്പെട്ട്​ ഒരു വിഭാഗം രക്ഷിതാക്കൾ കർണാടക വിദ്യാഭ്യാസ മന്ത്രി എസ്. സുരേഷ് കുമാറി​െൻറ വസതിക്ക്​ മുന്നിൽ പ്രതിഷേധ പ്രകടനം നടത്തിയിരുന്നു. അതിന്​ രണ്ടാഴ്ചയ്ക്ക് ശേഷമാണ് പുതിയ തീരുമാനം വരുന്നത്​.