കായിക പരിശീലനത്തിൽ ബി.എസ്.സി, എം.എസ്.സി

കേന്ദ്ര സർവകലാശാലയായ നാഷനൽ സ്​പോർട്സ് യൂനിവേഴ്സിറ്റി, ഇംഫാൽ (മണിപ്പൂർ) 2024-25 വർഷത്തെ ഇനി പറയുന്ന കോഴ്സുകളിൽ പ്രവേശനത്തിന് അപേക്ഷകൾ ക്ഷണിച്ചു. പ്രവേശനപരീക്ഷ, കായിക ക്ഷമതാ പരീക്ഷ, സ്​പോർട്സ് പ്രാവീണ്യം മുതലായവയുടെ അടിസ്ഥാനത്തിലാണ് സെലക്ഷൻ. ജൂലൈ ഒമ്പതിനാണ് പ്രവേശന പരീക്ഷ. 30 ശതമാനം സീറ്റുകൾ വനിതകൾക്കാണ്.

ബി.എസ്.സി (സ്​പോർട്സ് കോച്ചിങ്): ആർച്ചറി, അത്‍ലറ്റിക്സ്, ബാഡ്മിന്റൺ, ബോക്സിങ്, ഫുട്ബാൾ, ഷൂട്ടിങ്, സ്വിമ്മിങ്, വെയ്റ്റ്ലിഫ്റ്റിങ് (നാലുവർഷം). സീറ്റുകൾ: 80. യോഗ്യത: 45 ശതമാനം മാർക്കോടെ പ്ലസ്ടു . കായികനേട്ടങ്ങൾ കൈവരിച്ചിട്ടുള്ളവരാകണം.

ബാച്ചിലർ ഓഫ് ഫിസിക്കൽ എജുക്കേഷൻ ആൻഡ് സ്​പോർട്സ് (ബി.പി.ഇ.എസ്): (മൂന്നുവർഷം). യോഗ്യത: 45 ശതമാനം മാർക്കോടെ പ്ലസ്ടു. മുകളിലെ രണ്ടു കോഴ്സുകൾക്കും എസ്.സി/എസ്.ടി/പി.ഡബ്ല്യു.ഡി വിഭാഗങ്ങൾക്ക് പ്ലസ് ടുവിന് 40 ശതമാനം മാർക്ക് മതി.

എം.എസ്.സി (സ്​പോർട്സ് കോച്ചിങ്): (രണ്ടുവർഷം). യോഗ്യത: ബിരുദവും സ്​പോർട്സ് കോച്ചിങ് ഡിപ്ലോമയും അല്ലെങ്കിൽ BPED/BPES/ബി.എസ്.സി സ്​പോർട്സ് കോച്ചിങ് ബിരുദവും സ്​പോർട്സ് കോച്ചിങ് ഡിപ്ലോമയും. നാലുവർഷത്തെ ബി.എസ്.സി സ്​പോർട്സ് കോച്ചിങ് ബിരുദമുള്ളവർക്ക് സ്​പോർട്സ് കോച്ചിങ് ഡിപ്ലോമ വേണമെന്നില്ല.

യോഗ്യത പരീക്ഷ 50 ശതമാനം മാർക്കിൽ കുറയാതെ വിജയിച്ചിരിക്കണം. ദേശീയ സ്​പോർട്സ് പങ്കാളിത്തം അഭിലഷണീയം. അത്‍ലറ്റിക്സ്, ആർച്ചറി, ബാഡ്മിന്റൺ, ബോക്സിങ്, ഫുട്ബാൾ, ഷൂട്ടിങ്, സ്വിമ്മിങ്, വെയ്റ്റ്ലിഫ്റ്റിങ് എന്നീ ഇനങ്ങളിലാണ് പ്രവേശനം.

എം.എ സ്​പോർട്സ് സൈക്കോളജി: (രണ്ടുവർഷം). യോഗ്യത: ബി.പി.എഡ്/ബി.എ (സൈക്കോളജി), ബി.പി.ഇ.എസ്/ബി.എസ്.സി സ്​പോർട്സ് കോച്ചിങ് 50 ശതമാനം മാർക്കിൽ കുറയാതെ വിജയിച്ചിരിക്കണം. എസ്.സി/എസ്.ടി/പി.ഡബ്ല്യു.ഡി വിഭാഗങ്ങൾക്ക് 45 ശതമാനം മാർക്ക് മതി. സ്​പോർട്സ്/ഗെയിംസ് പങ്കാളിത്തം അഭിലഷണീയം.

മാസ്റ്റർ ഓഫ് ഫിസിക്കൽ എജുക്കേഷൻ ആൻഡ് സ്പോർട്സ് (എം.പി.ഇ.എസ്): (രണ്ടുവർഷം). യോഗ്യത: ബി.പി.ഇ.എസ്/തത്തുല്യ ബിരുദം 50 ശതമാനം മാർക്കോടെ വിജയിച്ചിരിക്കണം.

എം.എസ്.സി അപ്ലൈഡ് സ്​പോർട്സ് ന്യൂട്രീഷൻ: (രണ്ടുവർഷം). യോഗ്യത: ബിരുദം (ന്യൂട്രീഷൻ/ഹോം സയൻസ്/ഫുഡ് സയൻസ്/സ്​പോർട്സ് സയൻസ്/ബയോ കെമിസ്​ട്രി, സുവോളജി മുതലായ വിഷയങ്ങളിൽ) ബി.എ.എം.എസ്/ബി.പി.ഇ.എസ് 50 ശതമാനം മാർക്കോടെ വിജയിച്ചിരിക്കണം.

അപേക്ഷഫീസ് 1000 രൂപ. പ്രവേശന വിജ്ഞാപനം, വിശദവിവരങ്ങളടങ്ങിയ പ്രോസ്​പെക്ടസ് www.nsu.ac.inൽ. ജൂൺ 27 വരെ ഓൺലൈനായി അപേക്ഷിക്കാം.