13ാം വയസിൽ 17 കമ്പ്യൂട്ടർ ഭാഷകൾ പഠിച്ച് താരമായി​ അർണവ്​ ശിവറാം

ചെന്നൈ: 13ാം വയസിൽ 17 കമ്പ്യൂട്ടർ ഭാഷകൾ പഠിച്ച്​ റെക്കോഡ്​ നേട്ടം കൈവരിച്ച്​ അർണവ്​ ശിവറാം. കോയമ്പത്തൂർ സി.എസ്​ അക്കാദമി സ്കൂളിലെ ഒൻപതാം ക്ലാസ്​ വിദ്യാർഥിയാണ്​ ഈ അപൂർവനേട്ടത്തിനുടമയായത്​. നാലാം ക്ലാസിൽ പഠിക്കവെയാണ്​ കമ്പ്യൂട്ടർ പഠനമാരംഭിച്ചതെന്ന്​ അർണവ്​ ശിവറാം പറയുന്നു​. ജാവയും പൈത്തണും ഉൾപ്പെടെ 17 പ്രോഗ്രാമിങ്​ ഭാഷകൾ പഠിച്ചു.

13ാം വയസ്സിൽ 17 കമ്പ്യൂട്ടർ ഭാഷകൾ പഠിക്കുന്ന ഏറ്റവും പ്രായം കുറഞ്ഞയാളാണ്​ താനെന്നും കുറഞ്ഞ മുതൽമുടക്കിൽ ഇന്ത്യയിൽ ഓട്ടോ പൈലറ്റിനായി ആർട്ടിഫിഷ്യൽ ഇന്‍റലിജൻസിന്​ രൂപം നൽകുന്നതിനാണ്​ ഇപ്പോൾ ശ്രമിക്കുന്നതെന്നും ശിവറാം അറിയിച്ചു.

കോളജുകളിലും സർവകലാശാലകളിലും സംഘടിപ്പിക്കുന്ന മെഷീൻ ലേണിങ്, ആർട്ടിഫിഷ്യൽ ഇന്‍റലിജൻസ് എന്നിവയെക്കുറിച്ചുള്ള വർക് ഷോപ്പുകളിലും സെമിനാറുകളിലും പ​ങ്കെടുക്കാറുള്ള ശിവറാം മാത്തമാറ്റിക്സ് ടെക്നിക്​ അബാക്കസിൽ സർട്ടിഫൈഡ് ഗ്രാൻഡ്മാസ്റ്ററാണ്.