ചെന്നൈ അന്താരാഷ്​ട്ര വിമാനത്താവളത്തിൽ റാംപ് ഡ്രൈവർ, ഹാൻഡിമാൻ 422 ഒഴിവുകൾ

എയർ ഇന്ത്യ (AI) എയർപോർട്ട് സർവീസസ് ലിമിറ്റഡ് ചെന്നൈ അന്താരാഷ്ട്ര വിമാനത്താവളത്തിലേക്ക് യൂട്ടിലിറ്റി ഏജന്റ്-കം-റാംപ് ഡ്രൈവർ (130 ഒഴിവുകൾ), ഹാൻഡിമാൻ/ഹാൻഡി വിമെൻ (292) തസ്തികകളിൽ കരാർ അടിസ്ഥാനത്തിൽ 3 വർഷത്തേക്ക് നിയമനം നടത്തുന്നു. മേയ് 2, 4 തീയതികളിൽ രാവിലെ 9 മുതൽ ഉച്ചക്ക് 12 മണിവരെ എയർ ഇന്ത്യ യൂനിറ്റി കോംപ്ലക്സ്, പല്ലവാരം, കന്റോൺമെന്റ്, ചെന്നൈയിൽ വാക്ക്-ഇൻ- ഇന്റർവ്യൂ നടത്തി തെരഞ്ഞെടുക്കും. പുരുഷന്മാർക്കും വനിതകൾക്കും അഭിമുഖത്തിൽ പ​ങ്കെടുക്കാം. വിശദ വിവരങ്ങളടങ്ങിയ വിജ്ഞാപനം, അപേക്ഷാ ഫോറം www.aiasl.inൽനിന്നും ഡൗൺലോഡ് ചെയ്യാം.

യൂട്ടിലിറ്റി ഏജന്റ്-കം-റാംപ് ഡ്രൈവർ തസ്തികക്ക് എസ്.എസ്.എൽ.സി/തത്തുല്യ പരീക്ഷ പാസായി പ്രാബല്യത്തിലുള്ള ഹെവി മോട്ടോർ വെഹിക്കിൾ ഡ്രൈവിങ് ലൈസൻസുള്ളവർക്ക് ഇന്റർവ്യൂവിന് ഹാജരാകാം. ട്രേഡ് ടെസ്റ്റിൽ പ്രാവീണ്യം തെളിയിക്കണം. പ്രായപരിധി 28 വയസ്സ്. ഒ.ബി.സികാർക്ക് 3 വർഷവും പട്ടികജാതി/വർഗക്കാർക്ക് 5 വർഷവും ഇളവുണ്ട്. ശമ്പളം പ്രതിമാസം 24960 രൂപ.

ഹാൻഡിമാൻ/ഹാൻഡി വിമെൻ തസ്തികക്ക് പത്താംക്ലാസ്/തത്തുല്യ പരീക്ഷ വിജയിച്ചിരിക്കണം. ഇംഗ്ലീഷ്, ഹിന്ദി, പ്രാദേശിക ഭാഷകളിൽ പരിജ്ഞാനമുണ്ടാകണം. പ്രായപരിധി 28 വയസ്. പട്ടികജാതി/വർഗ/ഒ.ബി.സി വിഭാഗങ്ങൾക്ക് നിയമാനുസൃത വയസ്സിളവുണ്ട്. ശമ്പളം പ്രതിമാസം 22530 രൂപ. കായികക്ഷമത, പരീക്ഷയുടെ അടിസ്ഥാനത്തിലാണ് തെരഞ്ഞെടുപ്പ്.

വാക്ക്-ഇൻ-ഇന്റർവ്യൂവിൽ പ​​ങ്കെടുക്കുന്നവർ നിർദിഷ്ട ഫോറത്തിൽ തയാറാക്കിയ അപേക്ഷ, ബന്ധപ്പെട്ട സർട്ടിഫിക്കറ്റ്/രേഖകളുടെ ശരിപ്പകർപ്പുകൾ, അപേക്ഷാ ഫീസായി എ.ഐ. എയർപോർട്ട് സർവീസസ് ലിമിറ്റഡിന് മുംബൈയിൽ മാറ്റാവുന്ന 500 രൂപയുടെ ഡിമാൻഡ് ഡ്രാഫ്റ്റ് (വിമുക്ത ഭടന്മാർക്കും പട്ടികജാതി/വർഗ വിഭാഗങ്ങൾക്കും ഫീസില്ല) എന്നിവ കൈവശം കരുതണം. പാസ്​പോർട്ട് വലിപ്പമുള്ള കളർ ഫോട്ടോ അപേക്ഷയിൽ പതിച്ചിരിക്കണം. ഡിമാന്റ് ഡ്രാഫ്റ്റിന് പുറകിൽ പൂർണമായ പേരും മൊബൈൽ നമ്പറും എഴുതിയിരിക്കണം. പ്രാബല്യത്തിലുള്ള പാസ്​പോർട്ടുള്ളവർ അതിന്റെ ഫോട്ടോകോപ്പിയും അസലും കൈവശം വെക്കേണ്ടതാണ്. സെലക്ഷൻ നടപടികൾ അടക്കം കൂടുതൽ വിവരങ്ങൾ വിജ്ഞാപനത്തിലുണ്ട്.