എസ്​.എസ്​.സി കമ്പയിൻഡ്​ ഗ്രാജ്വേറ്റ്​ ലെവൽ പരീക്ഷ ഏപ്രിലിൽ

സ്റ്റാഫ്​ സെലക്​ഷൻ കമീഷൻ (എസ്​.എസ്​.സി) കേന്ദ്ര സർവിസുകളിൽ ഗ്രൂപ്​ ബി, സി തസ്തികകളിൽ നിയമനത്തിന്​ ഏപ്രിലിൽ നടത്തുന്ന കമ്പയിൻഡ്​ ഗ്രാജ്വേറ്റ്​ ലെവൽ പരീക്ഷക്ക്​ അപേക്ഷ ക്ഷണിച്ചു. ബിരുദമാണ്​ യോഗ്യത. വിജ്ഞാപനം https://ssc.nic.inൽ. അപേക്ഷഫീസ്​ 100 രൂപ. SC/ST/PWD/വിമുക്തഭടന്മാർ/വനിതകൾ എന്നീ വിഭാഗങ്ങൾക്ക്​ ഫീസില്ല. അപേക്ഷ ഓൺലൈനായി ജനുവരി 23നകം.

കേന്ദ്ര സർക്കാറിന്‍റെ വിവിധ വകുപ്പുകളിലും മന്ത്രാലയങ്ങളിലുമായി 36 തസ്തികകളിലേക്കാണ്​ തെരഞ്ഞെടുപ്പ്​. ഇന്ത്യൻ ഓഡിറ്റ്​ ആൻഡ്​ അക്കൗണ്ട്​സ്​ വകുപ്പിൽ അസിസ്റ്റന്‍റ്​ ഓഡിറ്റ്​/അക്കൗണ്ട്​സ്​ ഓഫിസർ, സെൻട്രൽ സെ​ക്രട്ടേറിയറ്റ്​ സർവിസ്,​ ഇന്‍റലിജൻസ്​ ബ്യൂറോ, റെയിൽവേസ്​ മുതലായ സ്ഥാപനങ്ങളിൽ അസിസ്റ്റന്‍റ്​ സെക്​ഷൻ ഓഫിസർ, വിവിധ കേന്ദ്ര സർക്കാർ വകുപ്പുകളിൽ അസിസ്റ്റന്‍റ്​; സി.ബി.ഐയിൽ സബ്​ഇൻസ്​പെക്ടർ, ഇൻകം ടാക്സ്​ ഇൻസ്​പെക്ടർ; പ്രിവന്‍റിവ്​ ഓഫിസർ, ഇ.ഡിയിൽ അസിസ്റ്റന്‍റ്​ എൻഫോഴ്​സ്​മെന്‍റ്​ ഓഫിസർ, നാർകോട്ടിക്സ്​ ബ്യൂറോയിൽ ഇൻസ്​പെക്ടർ; കോസ്റ്റ്​ ഗാർഡിൽ അസിസ്റ്റന്‍റ്​/സൂപ്രണ്ട്​; NIAയിൽ സബ്​ഇൻസ്​പെക്ടർ, സി ആൻഡ്​ എ.ജിയിൽ ഓഡിറ്റർ/അക്കൗണ്ടന്‍റ്​/ഡിവിഷനൽ അക്കൗണ്ടന്‍റ്​ മുതലായ തസ്തികകളിലേക്കാണ്​ നിയമനം. പതിനായിരത്തോളം ഒഴിവുകളുണ്ടാവും.

ചില തസ്തികകൾക്ക്​ യോഗ്യതയിൽ വ്യത്യാസമുണ്ട്​. അസിസ്റ്റന്‍റ്​ ഓഡിറ്റ്​/അക്കൗണ്ട്​സ്​ ഓഫിസർ- CA/CMA/CS/MCom/MBA ഫിനാൻസ്​/MBE യോഗ്യത അഭിലഷണീയം. ജൂനിയർ സ്റ്റാറ്റിസ്റ്റിക്സിൽ ഓഫിസർ- പ്ലസ്​ ടു തലത്തിൽ മാത്തമാറ്റിക്സിന്​ 60 ശതമാനം മാർക്കുണ്ടാകണം. ബിരുദത്തിനു​ പുറമെയാണിത്​. അല്ലെങ്കിൽ സ്റ്റാറ്റിസ്റ്റിക്സ്​ ഒരു വിഷയമായി ബിരുദം. സ്റ്റാറ്റിസ്റ്റിക്കൽ ഇൻവെസ്റ്റിഗേറ്റർ- സ്റ്റാറ്റിസ്റ്റിക്സ്​ ബിരുദം. നാഷനൽ കമ്പനി ലോ അപ്പലേറ്റ്​ ട്രൈബ്യൂണൽ അസിസ്റ്റന്‍റ്​ തസ്തികക്ക്​ നിയമ ബിരുദം അഭിലഷണീയം. റിസർച്​​ അസിസ്റ്റന്‍റ്​ തസ്തികക്ക്​ ഒരു വർഷത്തെ ഗവേഷണ പരിചയവും നിയമ/ഹ്യൂമൻറൈറ്റ്​സ്​ ബിരുദവും അഭിലഷണീയം. 1.1.2022ൽ പ്രായപരിധി 18-27/30/32​. ചില തസ്തികകൾക്ക്​ 20-30 വയസ്സ്​. സംവരണ വിഭാഗങ്ങൾക്ക്​ ചട്ടപ്രകാരം പ്രായപരിധിയിൽ ഇളവ്​ ലഭിക്കും.

കമ്പ്യൂട്ടർ അധിഷ്ഠിത പരീക്ഷ ദേശീയതലത്തിൽ ഏപ്രിലിൽ നടത്തും. പരീക്ഷഘടനയും സിലബസും വിജ്ഞാപനത്തിലുണ്ട്​. കേരളത്തിൽ കണ്ണൂർ, കോഴിക്കോട്​, തൃശൂർ, എറണാകുളം, കൊല്ലം, തിരുവനന്തപുരം പരീക്ഷകേന്ദ്രങ്ങളാണ്​.