കരസേനയിൽ എൻജിനീയറിങ് ബിരുദക്കാർക്ക് അവസരം

കരസേനയിൽ അവിവാഹിതരായ പുരുഷ/വനിത എൻജിനീയറിങ് ബിരുദക്കാർക്കും സായുധസേനയിൽ മരിച്ച ഡിഫൻസ് ജീവനക്കാരുടെ വിധവകൾക്കും പ്രീ-കമീഷനിങ് ​ട്രെയിനിങ് അക്കാദമി പരിശീലനത്തിലൂടെ ഷോർട്ട് സർവിസ് കമീഷൻ നേടി ലഫ്റ്റനന്റ് പദവിയിൽ ഓഫിസറാകാം. 63ാമത് എസ്.എസ്.സി-ടെക് മെൻ, 34ാമത് എസ്.എസ്.സി ടെക് വിമൻ വിഭാഗങ്ങളിലേക്ക് തെരഞ്ഞെടുക്കപ്പെടുന്നവർക്കാണ് പരിശീലനം. ആകെ 379 ഒഴിവുകൾ. എൻജിനീയറിങ് അനുബന്ധ സ്ട്രീമിൽ പുരുഷന്മാർക്ക് ലഭ്യമായ ഒഴിവുകൾ- സിവിൽ -75, കമ്പ്യൂട്ടർ സയൻസ് ആൻഡ് എൻജിനീയറിങ്/ഐ.ടി -60, ഇലക്ട്രിക്കൽ -33, ഇലക്​ട്രോണിക്സ് -64, മെക്കാനിക്കൽ -101, പ്ലാസ്റ്റിക് ടെക്, ഫുഡ്ടെക്, ബയോമെഡിക്കൽ, കെമിക്കൽ, മൈനിങ് അടക്കമുള്ള മറ്റ് സ്ട്രീമുകൾ -17.

എസ്.എസ്.സി ടെക് വനിതകൾക്ക് ലഭ്യമായ ഒഴിവുകൾ -സിവിൽ -7, കമ്പ്യൂട്ടർ സയൻസ് ആൻഡ് എൻജിനീയറിങ്/ഐ.ടി -4, ഇലക്ട്രിക്കൽ -3, ഇലക്​ട്രോണിക്സ് 6, മെക്കാനിക്കൽ -9, ഡിഫൻസ് ജീവനക്കാരുടെ വിധവകൾക്ക് ടെക്നിക്കൽ വിഭാഗത്തിൽ ഒരൊഴിവും നോൺ ടെക്നിക്കൽ വിഭാഗത്തിൽ ഒരൊഴിവും ലഭിക്കും. നോൺ ടെക്നിക്കൽ സ്ട്രീമിലേക്ക് ഏതെങ്കിലും ബിരുദമുള്ളവർക്ക് അപേക്ഷിക്കാം.

വിശദ വിവരങ്ങളടങ്ങിയ വിജ്ഞാപനം www.joinindianarmy.nic.inൽനിന്ന് ഡൗൺലോഡ് ചെയ്യാം. Officer Entry Apply/Loginൽ ക്ലിക്ക് ചെയ്ത് ഓൺലൈനായി ഫെബ്രുവരി 21 ഉച്ചക്കുശേഷം മൂന്നു മണിവരെ അപേക്ഷിക്കാം. ബിരുദം അവസാന വർഷക്കാരെയും വ്യവസ്ഥകൾക്കു വിധേയമായി പരിഗണിക്കും. പ്രായപരിധി 1.10.2024ൽ 20-27. മരിച്ച ഡിഫൻസ് ജീവനക്കാരുടെ വിധവകൾക്ക് 35 വയസ്സുവരെയാകാം.

അഭിമുഖത്തിലൂടെയാണ് സെലക്ഷൻ. തെരഞ്ഞെടുക്കപ്പെടുന്നവർക്ക് 49 ആഴ്ചത്തെ പരിശീലനം ചെന്നൈ ഓഫിസേഴ്സ് ​ ട്രെയിനിങ് അക്കാദമിയിൽ സൗജന്യമായി നൽകും. പരിശീലനം പൂർത്തിയാക്കുന്നവരെ ലഫ്റ്റനന്റ് പദവിയിൽ 56,100-1,77,500 രൂപ ശമ്പളനിരക്കിൽ നിയമിക്കും. ഇതോടൊപ്പം ഡിഫൻസ് മാനേജ്മെന്റ് ആൻഡ് സ്ട്രാറ്റജിക് സ്റ്റഡീസിൽ പി.ജി ഡിപ്ലോമയും സമ്മാനിക്കും. പരിശീലനകാലം മാസം 56,100 രൂപ സ്റ്റൈപൻഡുണ്ട്.