തുടക്കക്കാരായ ബിരുദധാരികളെ തേടി എച്ച്​.സി.എൽ; ഈ വർഷം 22,000 പേരെ നിയമിക്കും

നോയിഡ: ബിരുദധാരികൾക്ക്​ വൻ അവസരമൊരുക്കാനൊരുങ്ങി ഐ.ടി ഭീമൻമാരായ എച്ച്​.സി.എൽ. ഈ വർഷം 20,000 മുതൽ 22,000 വരെ ബിരുദധാരികളായ തുടക്കക്കാരെ കമ്പനി നിയമിക്കും. അടുത്തവർഷം 30,000ത്തിലധികം ബിരുദധാരികളായ തുടക്കക്കാരെയും കമ്പനിയി​ൽ നിയമിക്കുമെന്ന്​ മാനേജ്​മെന്‍റ്​ വ്യക്തമാക്കി.

സീനിയർ മാനേജർമാർക്ക്​ ആഴ്ചയിൽ രണ്ടുദിവസം ഓഫിസിലെത്താൻ കമ്പനി സൗകര്യമൊരുക്കി തുടങ്ങിയിരുന്നു. ആവശ്യകത അനുസരിച്ച്​ ആഴ്​ചയിൽ ഒരു ദിവസവും കമ്പനിയിലെത്താൻ അവസരം നൽകും. കോവിഡ്​ ഭീതി ഒഴിഞ്ഞതിന്​ ശേഷവും വർക്​ അറ്റ്​ ഹോം പ്രോത്സാഹിപ്പിക്കാനാണ് കൂടുതൽ​ ഐ.ടി കമ്പനികളുടെ നീക്കം.

കമ്പനിയിൽ കൊഴിഞ്ഞുപോകുന്ന ജീവനക്കാരുടെ എണ്ണം വർധിച്ചതോടെ ഐ.ടി ഭീമനായ ഇൻഫോസിസ്​ തുടക്കക്കാരെ വൻതോതിൽ നിയമിക്കാൻ ഒരുങ്ങുന്നുവെന്ന്​ അറിയിച്ചിരുന്നു. 45,000 തുടക്കക്കാരായ ബിരുദധാരികളെ നിയമിക്കാനാണ്​ ബംഗളൂരു ആസ്​ഥാനമായ കമ്പനിയുടെ ലക്ഷ്യം. നേരത്തേ 35,000 ബിരുദധാരികളെ നിയമിക്കാനായിരുന്നു തീരുമാനം.

എച്ച്​.സി.എൽ ജീവനക്കാർക്ക്​ ശമ്പളവർധന പ്രഖ്യാപിച്ചിരുന്നു. ഓഫ്​ഷോർ ജീവനക്കാർക്ക്​ ഏഴുമുതൽ എട്ടുശതമാനവും ഓൺസൈറ്റ്​ ജീവനക്കാർക്ക്​ മൂന്നുമുതൽ നാലുവരെയുമാണ്​ ശമ്പളവർധന. സീനിയർ മാനേജർമാരുടെ ശമ്പള വർധന പ്രഖ്യാപിച്ചിട്ടില്ല.

കോവിഡ്​ പ്രതിസന്ധിക്കിടയിലും മികച്ച വരുമാനമാണ്​ കമ്പനി പ്രതീക്ഷിക്കുന്നത്​. 2022ൽ വരുമാന വർധന നിരക്ക് ഉയർത്തുകയാണ്​ കമ്പനിയുടെ ലക്ഷ്യം.