ഇലക്ട്രോണിക്സ് കോർപറേഷനിൽ ഗ്രാജ്വേറ്റ് എൻജിനീയർ ട്രെയിനി, ടെക്നീഷ്യൻ ഒഴിവുകൾ

കേന്ദ്ര ആണവോർജ വകുപ്പിന് കീഴിലുള്ള പൊതുമേഖല സ്ഥാപനമായ ഇലക്ട്രോണിക്സ് കോർപറേഷൻ ഓഫ് ഇന്ത്യ ലിമിറ്റഡ് ഹൈദരാബാദ് അതിന്റെ വിവിധ മേഖല/ ബ്രാഞ്ച്/ സൈറ്റ് ഓഫിസുകളിലേക്ക് താഴെ പറയുന്ന തസ്തികകളിൽ നിയമനത്തിന് അപേക്ഷകൾ ക്ഷണിച്ചു. അപേക്ഷ ഫീസ് ജനറൽ/ ഇ.ഡബ്ല്യു.എസ്/ ഒ.ബി.സി വിഭാഗങ്ങൾക്ക് 750 രൂപ.

ഗ്രാജ്വേറ്റ് എൻജിനീയർ ട്രെയിനി (ജി.ഇ.ടി): ശമ്പളനിരക്ക് 40,000 -1,40,000 രൂപ. ഒഴിവുകൾ 80 (ഇ.സി.ഇ/ ഇലക്ട്രോണിക്സ്/ ഇലക്ട്രോണിക്സ് ആൻഡ് ടെലികമ്യൂണിക്കേഷൻ 34, ഇലക്ട്രോണിക്സ് ആൻഡ് ഇൻസ്ട്രുമെന്റേഷൻ/ ഇൻസ്ട്രുമെന്റേഷൻ 2, കമ്പ്യൂട്ടർ സയൻസ് ആൻഡ് എൻജിനീയറിങ്/ ഐ.ടി 18, മെക്കാനിക്കൽ 16, ഇലക്ട്രിക്കൽ/ ഇലക്ട്രിക്കൽ ആൻഡ് ഇലക്ട്രോണിക്സ് 5, സിവിൽ 3, കെമിക്കൽ 2).

യോഗ്യത: ബന്ധപ്പെട്ട ബ്രാഞ്ചിൽ/ വിഷയത്തിൽ മൊത്തം 60 ശതമാനം മാർക്കിൽ കുറയാതെ നാലുവർഷത്തെ ഫുൾടൈം എൻജിനീയറിങ് ബിരുദം. അവസാനവർഷ/ സെമസ്റ്റർ വിദ്യാർഥികളെയും പരിഗണിക്കും. പ്രായപരിധി 30.4.2025ൽ 27 വയസ്സ്. എസ്.സി/ എസ്.ടി വിഭാഗങ്ങൾക്ക് അഞ്ചു വർഷം, ഒ.ബി.സി നോൺ ക്രീമിലെയർ വിഭാഗങ്ങൾക്ക് മൂന്നു വർഷം, ഭിന്നശേഷിക്കാർക്ക് 10 വർഷം, വിമുക്തഭടന്മാർക്കും മറ്റും ചട്ടപ്രകാരവും പ്രായപരിധിയിൽ ഇളവുണ്ട്.

എസ്.സി/ എസ്.ടി വിഭാക്കാർക്ക് യോഗ്യത പരീക്ഷക്ക് 50 ശതമാനം മാർക്ക് മതിയാകും. കമ്പ്യൂട്ടർ അധിഷ്ഠിത പരീക്ഷ, അഭിമുഖം എന്നിവയുടെ അടിസ്ഥാനത്തിലാണ് സെലക്ഷൻ. ബംഗളൂരു, ചെന്നൈ, ഹൈദരാബാദ്, മുംബൈ, ന്യൂഡൽഹി, കൊൽക്കത്ത പരീക്ഷകേന്ദ്രങ്ങളാണ്.

ടെക്നീഷ്യൻ ഗ്രേഡ്-2: അടിസ്ഥാന ശമ്പളം 20,480 രൂപ, ഒഴിവുകൾ 45 (ഇലക്ട്രോണിക്സ് മെക്കാനിക് 11, ഫിറ്റർ 7, മെഷ്യനിസ്റ്റ് 7, ടർണർ 5, ഷീറ്റ് മെറ്റൽ 2, വെൽഡർ 2, കാർപന്റർ 2, പെയിന്റർ 2). യോഗ്യത: എസ്.എസ്.എൽ.സി/ തത്തുല്യം + ബന്ധപ്പെട്ട ട്രേഡിൽ ഐ.ടി.ഐ/ നാഷനൽ ട്രേഡ് സർട്ടിഫിക്കറ്റ് വിത്ത് നാഷനൽ അപ്രന്റീസ്ഷിപ് സർട്ടിഫിക്കറ്റ് അല്ലെങ്കിൽ എസ്.എസ്.എൽ.സി + ഐ.ടി.ഐ (എൻ.ടി.സി) സർട്ടിഫിക്കറ്റ്. മാനുഫാക്ചറിങ് പ്രോസസിലുള്ള ഒരുവർഷത്തെ പ്രവൃത്തിപരിചയം. പ്രായപരിധി 30.4.2025ൽ 27 വയസ്സ്. നിയമാനുസൃത വയസ്സിളവ് ലഭിക്കും.

ബംഗളൂരു, ചെന്നൈ, ഹൈദരാബാദ്, മുംബൈ, ന്യൂഡൽഹി, കൊൽക്കത്ത കേന്ദ്രങ്ങളിലായി നടത്തുന്ന കമ്പ്യൂട്ടർ അധിഷ്ഠിത പരീക്ഷ, വ്യക്തിഗത അഭിമുഖം എന്നിവയുടെ അടിസ്ഥാനത്തിലാണ് സെലക്ഷൻ. വിശദവിവരങ്ങളടങ്ങിയ വിജ്ഞാപനം https://www.ecil.co.in/jobs.htmlൽ ലഭിക്കും. ഓൺലൈനിൽ ജൂൺ അഞ്ച് ഉച്ച രണ്ടുമണി വരെ അപേക്ഷിക്കാം. കൂടുതൽ വിവരങ്ങൾ വിജ്ഞാപനത്തിലുണ്ട്.