ഈ വിജയം പോരാട്ടം​; മലസർ വിഭാഗത്തിൽനിന്ന്​ ആദ്യമായി ഡോക്​ടറാകാനൊരുങ്ങി സംഘവി

കോയമ്പത്തൂർ: നീറ്റ്​ പരീക്ഷാ ഫലം പ്രഖ്യാപിച്ചപ്പോൾ തിളക്കമാർന്ന വിജയം നേടിയ ഒരാളാണ്​ സംഘവി. തമിഴ്​നാട്ടിലെ മലസർ പട്ടിക വർഗ വിഭാഗത്തിൽനിന്ന്​ ആദ്യമായി ഡോക്​ടറാകാനൊരുങ്ങുകയാണ്​ ഈ 19കാരി. നീറ്റ്​ പരീക്ഷാഫലം പ്രഖ്യാപിച്ചപ്പോൾ 202 മാർക്കാണ്​ സംഘവി നേടിയത്​.

കോയമ്പത്തൂർ മധുകരൈ താലൂക്കിലെ റൊട്ടിഗൗണ്ടൻ പുദൂർ ഗ്രാമത്തിലാണ്​ സംഘവിയുടെ താമസം. സ്വന്തം ഗ്രാമത്തിൽനിന്ന്​ ആദ്യമായി പ്ലസ്​ ടു വിജയിച്ചയാൾ കൂടിയാണ്​ സംഘവി. രണ്ടാമ​ത്തെ ശ്രമത്തിലാണ്​ നീറ്റ്​ പരീക്ഷക്ക്​ 720ൽ 202 എന്ന മാർക്ക്​ നേട്ടം സംഘടിക്ക്​ സ്വന്തമാക്കാനായത്​. മലസർ വിഭാഗത്തിൽ 108 ആണ്​​ കട്ട്​ ഓഫ്​ മാർക്ക്​. 202 മാർക്ക്​ നേടിയതിനാൽ നല്ല സർക്കാർ മെഡിക്കൽ കോളജിൽ തന്നെ ​പ്രവേശനം ലഭിക്കുമെന്ന ആത്മവിശ്വാസത്തിലാണ്​ സംഘവിയും കുടുംബവും.

കഴിഞ്ഞവർഷം അച്ഛൻ മുനിയപ്പനെ നഷ്​ടപ്പെട്ട സംഘവിക്ക്​ പാതി അന്ധയായ അമ്മ വസന്താമണിയായിരുന്നു കൂട്ട്​. ലോക്​ഡൗണിലെ കഷ്​ടതകളോട്​ പോരാടിയായിരുന്നു നീറ്റ്​ പരീക്ഷക്കുള്ള തയാറെടുപ്പ്​. ആദ്യ ശ്രമത്തിലെ ദയനീയ പരാജയത്തിൽനിന്ന്​ വിജയം നേടാനായി കഠിനപരിശ്രമം വേണ്ടിവന്നു ഈ മിടുക്കിക്ക്​. തന്‍റെ വിജയം ആദിവാസി സമൂഹത്തിന്​ സമർപ്പിക്കുന്നതായി സംഘവി പറയുന്നു. രോഗങ്ങൾ മൂലം കഷ്​ടപ്പെടുന്ന തന്‍റെ ഗ്രാമവാസികൾക്ക്​ സഹായം ലഭ്യമാക്കുകയാണ്​ ലക്ഷ്യമെന്നും സംഘവി കൂട്ടിച്ചേർത്തു.