നീറ്റിൽ മുഴുവൻ മാർക്കും ഒന്നാം റാങ്കും; പിലിക്കോടിന് അഭിമാനമായ് കാർത്തിക

ചെറുവത്തൂർ: ദേശീയ മെഡിക്കൽ പ്രവേശന പരീക്ഷയായ നീറ്റിൽ മുഴുവൻ മാർക്കും ഒന്നാം റാങ്കും നേടിയ കാർത്തിക ജി. നായർ പിലിക്കോട് നാടിന് അഭിമാനമായി. ഉറക്കമില്ലാതെ പഠിച്ച് നേടിയ വിജയത്തിലൂടെ കാർത്തിക ദേശീയ ശ്രദ്ധ നേടിയിരിക്കുകയാണ്.

മുംബൈയിലെ സ്വകാര്യ കമ്പനി മാനേജരായ എരവിലെ ഗംഗാധരൻ കെ. നായരുടെയും കോളജ് അധ്യാപിക ശ്രീവിദ്യ നായരുടെയും മകളാണ് കാർത്തിക. മുംബൈയിലാണ് താമസം.

ഡൽഹി എയിംസിൽ തുടർപഠനം നടത്തണമെന്നാണ് ഈ മിടുക്കിയുടെ ആഗ്രഹം. സഹോദരി ഗീതിക ആറാം ക്ലാസ്​ വിദ്യാർഥിനിയാണ്.