എന്താണ് ഇ-റുപ്പി... അതുവഴി എങ്ങനെ പണമില്ലാതെ സർക്കാർ സേവനങ്ങൾ ലഭ്യമാക്കാം

ഇടനിലക്കാരുടെയും മധ്യസ്​ഥൻമാരുടെയും മറ്റും ഇടപെടലിന്‍റെ ഫലമായി സർക്കാർ സഹായം ജനങ്ങളിലേക്ക്​ ഫലപ്രദമായി എത്തുന്നില്ലെന്ന പരാതി വ്യാപകമായി ഉയരാൻ തുടങ്ങിയിട്ട്​ നാളുകൾ ഏറെയായി.

ക്ഷേമപദ്ധതികളിലെ അഴിമതിയും വഞ്ചനയും കുറയ്ക്കുക എന്ന ലക്ഷ്യത്തിലേക്കുള്ള ഒരു പ്രധാന ചുവടുവെപ്പായാണ്​ ഡയറക്റ്റ് ബെനിഫിറ്റ് ട്രാൻസ്ഫർ (ഡി.ബി.ടി) ആരംഭിച്ചത്. ആധുനിക സാങ്കേതികവിദ്യയും ഐ.ടി ഉപകരണങ്ങളും ഉപയോഗപ്പെടുത്തി വേഗത്തിൽ ഫണ്ട്​ ഒഴുകാനും കൃത്യമായ ഗുണഭോക്താക്കളിൽ എത്തിക്കാനുമാണ്​ ഇതിലൂടെ ലക്ഷ്യമിടുന്നത്​.

ഫണ്ട്​ വിതരണത്തിലെ ഈ 'ചോർച്ച' തടയാൻ കേന്ദ്ര സർക്കാറിന്‍റെ ഏറ്റവും പുതിയ സംരംഭമായ ഇ-റുപ്പി ഇന്ന്​ പ്രധാനമന്ത്രി അവതരിപ്പിക്കു​കയാണ്​. ഇ-റുപ്പിയെ കുറിച്ച്​ അറിയേണ്ടതെല്ലാം വിവരിക്കുകയാണ്​ ചുവടെ.

എന്താണ്​ ഇ-റുപ്പി?

രാജ്യത്ത്​ ഡിജിറ്റൽ പണമിടപാടുകൾ പ്രോത്സാഹിപ്പിക്കുന്നതിനായായാണ്​ ഇ -റുപ്പി അവതരിപ്പിക്കുന്നത്​. ഇലക്​ട്രോണിക്​ വൗച്ചർ അടിസ്​ഥാനമാക്കിയുള്ള ഡിജിറ്റൽ പേമെന്‍റ്​ സിസ്റ്റം നാഷനൽ പേമെന്‍റ്​സ്​ കോർപ​േറഷനാണ്​ (എൻ.പി.സി.ഐ) വികസിപ്പിച്ചത്​.

ദേശീയ സാമ്പത്തിക സേവന വകുപ്പ്​, ആരോഗ്യ കുടുംബക്ഷേമ മന്ത്രാലയം, ദേശീയ ആരോഗ്യ അതോറിറ്റി എന്നിവയുടെ സഹകരണത്തോടെയാണ്​ യു.പി.ഐ പ്ലാറ്റ്​ഫോമിൽ ഇത്​ വികസിപ്പിച്ചെടുത്തിരിക്കുന്നത്. ഡിജിറ്റൽ പേമെന്‍റിന്‍റെ പണ -സമ്പർക്ക രഹിത രൂപമാണ്​ ഇ-റുപ്പി.

ഇ -റുപ്പി സേവനം എങ്ങനെ ഉപയോഗപ്പെടുത്താം?

ഇ-റൂപ്പി സംവിധാനം മൊബൈൽ ഫോണുകളെ ആശ്രയിച്ചാണ്​. ഇത് തടസ്സമില്ലാത്ത ഒറ്റത്തവണ പേയ്‌മെന്‍റ്​ സംവിധാനമാണ്. ഒരു ഗുണഭോക്താവിന് അവരുടെ മൊബൈൽ ഫോണിൽ ഒരു ക്യു.ആർ കോഡ് അല്ലെങ്കിൽ എസ്​.എം.എസ്​ അധിഷ്‌ഠിത ഇ-വൗച്ചർ ലഭിക്കും. അത് വിവിധ സേവന ദാതാക്കളിൽ നിന്ന് വീണ്ടെടുക്കാം. ഉദാഹരണത്തിന് ആശുപത്രിയിലോ അല്ലെങ്കിൽ ആരോഗ്യ കേന്ദ്രത്തിലോ വൗച്ചറുകൾ ഉപയോഗപ്പെടുത്താം. ഇ -റുപ്പി പേമേന്‍റെ്​ സേവനത്തിന്‍റെ സഹായത്തോടെ കാർഡ്​, ഡിജിറ്റൽ പേമെന്‍റ്​ ആപ്പ്​, ഇന്‍റർനെറ്റ്​ ബാങ്കിങ്​ ഇല്ലാതെ ഉപഭോക്താവിന്​ വൗച്ചർ ഉപയോഗിക്കാൻ കഴിയും. ക്യാഷ്​ലെസ്​ ആയി കോവിഡ്​ വാക്​സിനേഷനുള്ള സൗകര്യവും ഇ-റുപ്പി ഒരുക്കുന്നു.

ഇ -റുപ്പി സേവനങ്ങളുടെ സ്​പോൺസർമാരുമായി ഉപഭോക്താക്കളെയും സേവന ദാതാക്കളെയും ഡിജിറ്റൽ രൂപത്തിൽ ബന്ധിപ്പിക്കും. ഇടപാട്​ പൂർത്തിയായതിന്​ ശേഷം മാത്രമേ സേവന ദാതാവിന്​ പണം ലഭിക്കൂവെന്നും ഉറപ്പാക്കും. പ്രീ പെയ്​ഡ്​ സേവനമാണ്​ അടിസ്​ഥാനം. അതിനാൽ സേവന ദാതാവിന്​ കൃത്യസമയത്ത്​ പണം ലഭിക്കുന്നുണ്ടെന്നും ഉറപ്പുവരുത്തും. സ്​റ്റേറ്റ്​ ബാങ്ക്​ ഓഫ്​ഇന്ത്യ, എച്ച്​.ഡി.എഫ്​.സി ബാങ്ക്​, ആക്​സിസ്​ ബാങ്ക്​, പഞ്ചാബ്​ നാഷനൽ ബാങ്ക്​ എന്നിവർ ഇ-റുപ്പി സംവിധാനത്തോട്​ സഹകരിക്കുന്നു.

ഇ -റുപ്പി ഗുണഭോക്താക്കൾ ആരൊക്കെ​?

സ്​ത്രീകൾക്കും കുട്ടികൾക്കും മരുന്ന്​, പോഷകാഹാര പിന്തുണ നൽകുന്ന പദ്ധതികളിലേക്ക്​ ഇ-റുപ്പി സേവനം ഉറപ്പുവരുത്താം. മാതൃ -ശിശു ക്ഷേമ പദ്ധതികൾ, ക്ഷയരോഗ നിർമാർജന പരിപാടികൾ, ആയുഷ്​മാർ ഭാരത്,​ പ്രധാൻ മന്ത്രി ജൻ ​ആരോഗ്യ യോജന, വളം സബ്​സിഡികൾ തുടങ്ങിയവയുടെ സേവനങ്ങൾക്കായി ഉപ​േയാഗിക്കാം.

സ്വകാര്യ മേഖലക്കും ഈ ഡിജിറ്റൽ വൗച്ചറുകൾ അവരുടെ ജീവനക്കാരുടെ ക്ഷേമ പദ്ധതികൾക്കും സി.എസ്​.ആർ ഫണ്ടുകളുടെയും ഭാഗമായി പ്രയോജനപ്പെടുത്താനാകുമെന്നും പ്രധാനമന്ത്രിയുടെ ഓഫീസ്​ അറിയിച്ചു.

മൊബൈൽ നമ്പർ മതി ബാങ്ക്​ അക്കൗണ്ട്​ ആവശ്യമില്ല

ഡി.ബി.ടി പദ്ധതികൾക്കായി ജൻധൻ അക്കൗണ്ട്​, ആധാർ നമ്പർ, മൊബൈൽ നമ്പർ എന്നിവ ആവശ്യമാണ്​. ആധാർ നമ്പർ നിർബന്ധമല്ല. എന്നാൽ ഇ-റുപ്പിക്ക്​ ബാങ്ക്​ അക്കൗണ്ട്​ വിവരങ്ങൾ ആവശ്യമില്ല. ഗുണഭോക്താവിന്‍റെ മൊബൈൽ നമ്പർ മാത്രമാണ്​ ആവശ്യം. ഗുണഭോക്താക്കൾക്ക് സഹായം എത്തിക്കുന്നതിനായി ഡി.ബി.ടി പദ്ധതി 100 കോടി മൊബൈൽ കണക്ഷനുകളെ ആശ്രയിക്കുന്നു.

ഇന്ത്യയിലെ നാഗരിക ജനസംഖ്യയുടെ 85 ശതമാനവും മൊബൈൽ ഫോൺ ഉപയോഗിക്കുന്നതായി 2019ൽ​ റിപ്പോർട്ട് പുറത്തു വന്നിരുന്നു​.