സീഷെല്ലിലേക്ക്​ പോകാൻ തയാറാകാൻ പറഞ്ഞു; ചിത്രരാമകൃഷ്ണയും വിവാദ യോഗിയും തമ്മിലുള്ള കൂടുതൽ സംഭാഷണങ്ങൾ പുറത്ത്​

ന്യൂഡൽഹി: എൻ.എസ്​.ഇ മുൻ ഡയറക്ടർ ചിത്രരാമകൃഷ്ണയും വിവാദ യോഗിയും തമ്മിലുള്ള സംഭാഷണത്തിന്‍റെ കൂടുതൽ വിവരങ്ങൾ പുറത്ത്​. ഇരുവരും തമ്മിലുള്ള ഇമെയിൽ സന്ദേശങ്ങളുടെ വിവരങ്ങളാണ്​ പുറത്ത്​ വന്നത്​. 20 വർഷങ്ങൾക്ക്​ മുമ്പ്​ ഗംഗയുടെ തീരങ്ങളിലാണ്​ താൻ ആദ്യം യോഗിയെ കണ്ടതെന്ന്​ ചിത്രരാമകൃഷ്ണ സെബിയോട്​ വെളിപ്പെടുത്തിയിട്ടുണ്ട്​. ഒരുതവണ കണ്ടതൊഴിച്ചാൽ പിന്നീട്​ ഇയാളെ നേരിട്ട്​ കണ്ടിട്ടില്ല. യോഗി നൽകിയ ഇമെയിൽ ഐഡിയിലൂടെയായിരുന്നു പിന്നീടുള്ള ആശയവിനിമയങ്ങൾ. വ്യക്​തിപരമായ കാര്യങ്ങൾക്കും പ്രൊഫഷണൽ ആവശ്യങ്ങൾക്കും താൻ യോഗിയുടെ സഹായം തേടിയെന്നും ചിത്രരാമകൃഷ്ണ സെബിയോട്​ വെളിപ്പെടുത്തിയിട്ടുണ്ട്​.

2015 ഫെബ്രുവരി 25ന്​ ചിത്രക്ക്​ ലഭിച്ച ഇമെയിലിൽ ദ്വീപ്​രാഷ്ട്രമായ സീഷെല്ലിലേക്ക്​ പോകാൻ തയാറായിരിക്കാൻ യോഗി ആവ​ശ്യപ്പെടുന്നുണ്ട്​. ടിക്കറ്റ്​ അടക്കമുള്ള കാര്യങ്ങൾ താൻ ഏർപ്പാടാക്കാമെന്നും യോഗി പറയുന്നുണ്ട്​. നീന്തൽ അറിയുമെങ്കിൽ സീഷെല്ലിലെ കടൽ നിങ്ങൾക്ക്​ നന്നായി ആസ്വദിക്കാമെന്നും ഇയാൾ ചിത്രരാമകൃഷ്ണയോട്​ പറയുന്നുണ്ട്​.

ഫെബ്രുവരി 25ന്​ അയച്ച ഇമെയിലിൽ അഞ്ജാതനായ ഒരാൾ ചിത്രരാമകൃഷ്ണന്​ വിവിധ ഹെയർ സ്​റ്റൈലുകളെ കുറിച്ച്​ പറഞ്ഞുകൊടുക്കുന്നുണ്ട്​. സെപ്തംബറിൽ അയച്ച ഇമെയിലിൽ താൻ അയച്ചുതന്ന ഭക്​തിഗാനം കേട്ടോയെന്നായിരുന്നു അജ്ഞാതന്‍റെ ചിത്ര രാമകൃഷ്​ണയോടുള്ള ചോദ്യം. അതേസമയം, ഹിമാലയൻ യോഗിക്ക്​ എൻ.എസ്​.ഇയുടെ വിവരങ്ങൾ ചോർത്തി നൽകി വിവാദത്തിലായ ചിത്രരാമകൃഷ്ണയെ സി.ബി.ഐ കഴിഞ്ഞ ദിവസം ചോദ്യം ചെയ്തിരുന്നു. ആദായ നികുതി വകുപ്പ്​ ചിത്ര രാമകൃഷ്​ണയുടെ വീട്ടിൽ പരിശോധന നടത്തുകയും ചെയ്തിരുന്നു.