ഒമിക്രോൺ ആശങ്ക; കുതിച്ചുയർന്ന്​ സ്വർണവില

ന്യൂഡൽഹി: ഒമിക്രോൺ ഭീതി ശക്​തമാകുന്നതിനിടെ രാജ്യത്ത്​ സ്വർണവിലയും ഉയരുന്നു. എം.സി.എക്​സിൽ ഫെബ്രുവരിയിലെ സ്വർണത്തിന്‍റെ ഫ്യൂച്ചർ കോൺട്രാക്​ടിൽ 524 രൂപയുടെ വർധനവ്​ രേഖപ്പെടുത്തി. 10 ഗ്രാം സ്വർണത്തിന്‍റെ വില 524 രൂപ വർധിച്ച്​ 47,925 രൂപയിലേക്ക്​ എത്തി. ഒറ്റ ദിവസത്തിൽ 1.11 ശതമാനം വർധനയാണ്​ രേഖപ്പെടുത്തിയത്​.

പണപ്പെരുപ്പം, രൂപയുടെ മൂല്യശോഷണം, സ്വർണത്തിനും വെള്ളിക്കുമുണ്ടായ വാണിജ്യ ആവശ്യകതയിലെ വർധനവ്​ എന്നിവയെല്ലാം വിലയെ സ്വാധീനിക്കുന്നുണ്ട്​. ദീർഘകാലത്തേക്ക്​ രാജ്യത്ത്​ ഒമിക്രോൺ ഭീതി നിലനിൽക്കുകയാണെങ്കിൽ സ്വർണവില ഇനിയും ഉയരുമെന്നാണ്​ വിദഗ്​ധർ നൽകുന്ന മുന്നറിയിപ്പ്​.

സ്​പോട്ട്​ ഗോൾഡിന്‍റെ വില ഔൺസിന്​ 1835 ഡോളറായി വർധിക്കുമെന്നാണ്​ പ്രവചനം. എം.സി.എക്​സിൽ സ്വർണവില 10 ഗ്രാമിന്​ 49,000 രൂപ വരെയായി ഉയരുമെന്നും റിപ്പോർട്ടുകളുണ്ട്​. ഒമിക്രോൺ ഭീതിക്കിടെ ഓഹരി വിപണികൾ കഴിഞ്ഞ ദിവസം നഷ്​ടത്തോടെയാണ്​ വ്യാപാരം അവസാനിപ്പിച്ചത്​. ബോം​െബ സൂചിക സെൻസെക്​സ്​ 764 പോയിന്‍റ്​ ഇടിഞ്ഞപ്പോൾ ദേശീയ സൂചിക നിഫ്​റ്റി 204 പോയിന്‍റും ഇടിഞ്ഞു.