റെക്കോർഡ്​ ഉയരത്തിൽ നിന്ന്​ അതിവേഗ വീഴ്ച; നിക്ഷേപകർക്ക്​ നഷ്​ടമായത്​ 14 ലക്ഷം കോടി

മുംബൈ: റെക്കോർഡ്​ ഉയരത്തിൽ നിന്നും അതേ വേഗതയിൽ ഓഹരി വിപണി താഴേക്ക്​ പതിച്ചതോടെ നിക്ഷേപകർക്കുണ്ടായത്​ വൻനഷ്​ടം. ഒക്​ടോബർ 19നായിരുന്നു വിപണികൾ റെക്കോർഡുകൾ ഭേദിച്ച്​ മുന്നേറിയത്​. സെൻസെക്​സ്​ 62,245 പോയിന്‍റിലും നിഫ്​റ്റി 18,064 പോയിന്‍റിലുമാണ്​ അന്ന്​ വ്യാപാരം അവസാനിപ്പിച്ചത്​. അതിന്​ ശേഷം ഇരു സൂചികകളും എട്ട്​ ശതമാനം ഇടിഞ്ഞു. നിക്ഷേപകർക്ക്​ നഷ്​ടമായത്​ ഏകദേശം 14 ലക്ഷം കോടി.

ഒക്​ടോബർ 19ന്​ സെൻസെക്​സിന്‍റെ വിപണിമൂലധനം 2,74,69,606.93 കോടിയായിരുന്നു. എന്നാൽ, ഇന്ന്​ അത്​ 2,60,81,433.97 കോടിയിലെത്തി. ഇരു സൂചികകളും രണ്ട്​ ശതമാനമാണ്​ ഇടിഞ്ഞത്​. 1400 പോയിന്‍റ്​ ഇടിവാണ്​ സെൻസെക്​സിൽ രേഖപ്പെടുത്തിയത്​. നിഫ്​റ്റി 400 പോയിന്‍റും ഇടിഞ്ഞു.വിപണിയിൽ എല്ലാ സെക്​ടറുകൾക്കും തകർച്ച നേരിട്ടു. ഏറ്റവും കൂടുതൽ ഇടിഞ്ഞത്​ ബി.എസ്​.ഇ മെറ്റൽ ഇൻഡക്​സായിരുന്നു. 13.6 ശതമാനം ഇടിവാണ്​ രേഖപ്പെടുത്തിയത്​. എനർജിയും ഇരട്ടയക്കത്തിന്‍റെ നഷ്​ടം രേഖപ്പെടുത്തി.

ബി.എസ്​.ഇ ബാങ്ക്​എക്​സ്​(8.2), ഫിനാൻസ്​(7.37), എഫ്​.എം.സി.ജി(7.04), ബി.എസ്​.ഇ ഐ.ടി(6.68), ബി.എസ്​.ഇ ഓയിൽ&ഗ്യാസ്​(6.1), ബി.എസ്​.ഇ ഓ​ട്ടോ(6.01), ബി.എസ്​.ഇ റിയാലിറ്റി(5.74) എന്നിങ്ങനെയാണ്​ വിവിധ സെക്​ടറുകളിലെ നഷ്​ടം. ബി.എസ്​.ഇ മിഡ്​ക്യാപ്പും സ്​മോൾ ക്യാപ്പും യഥാക്രമം 5.65 ശതമാനവും 4.6 ശതമാനവും ഇടിഞ്ഞു.

​വിവിധ രാജ്യങ്ങളുടെ കേന്ദ്രബാങ്കുകൾ പലിശനിരക്ക്​ ഉയർത്താനുള്ള സാധ്യത, പണപ്പെരുപ്പം, കോവിഡ്​ തുടങ്ങിയവയാണ്​ വിപണിയെ സ്വാധീനിക്കുന്നത്​. ദക്ഷിണാഫ്രിക്കയിൽ പുതിയ കോവിഡ്​ വകഭേദം കണ്ടെത്തിയത്​ സ്ഥിതി സങ്കീർണമാക്കി.