ബജറ്റിന്​ പിന്നാലെ ഓഹരി വിപണികൾ നേട്ടത്തോടെ വ്യാപാരം തുടങ്ങി

മുംബൈ: ബജറ്റ്​ അവതരണത്തിന്​ പിന്നാലെ ഇന്ത്യൻ ഓഹരി വിപണികൾ നേട്ടത്തോടെ വ്യാപാരം തുടങ്ങി. നിഫ്​റ്റി 17700 പോയിന്‍റിന്​ മുകളിലാണ്​ വ്യാപാരം. സെൻസെക്സ്​ 493 പോയിന്‍റും നിഫ്​റ്റി 144 പോയിന്‍റും നേട്ടത്തോടെയുമാണ്​ വ്യാപാരം പുരോഗമിക്കുന്നത്​.

1204 ഓഹരികൾ നേട്ടമുണ്ടാക്കിയപ്പോൾ 483 എണ്ണം ഇടിഞ്ഞു. 85 ഓഹരികൾക്ക്​ മാറ്റമുണ്ടായില്ല. കൊട്ടക്​ മഹീന്ദ്ര ബാങ്ക്​, ഐ.ടി.സി, ബജാജ്​ ഫിനാൻസ്​, പവർഗ്രിഡ്​ കോർപ്പറേഷൻ, എച്ച്​.ഡി.എഫ്​.സി ലൈഫ്​ തുടങ്ങിയ ഓഹരികൾ നേട്ടമുണ്ടാക്കി. ടെക്​ മഹീന്ദ്ര, അദാനി പോർട്ട്​, അൾട്രാടെക്​, ബ്രിട്ടാനിയ ഇൻഡസ്​ട്രീസ്​ എന്നിവയാണ്​ നഷ്ടമുണ്ടാക്കിയ ഓഹരികൾ.

ഈ ആഴ്ചയിൽ കഴിഞ്ഞ രണ്ട്​ ദിവസവുമുണ്ടായ നേട്ടം വ്യാപാരത്തിന്‍റെ തുടക്കത്തിലും വിപണി നിലനിർത്തുകയായിരുന്നു. ഏഷ്യൻ വിപണികളിൽ ജപ്പാൻ, ആസ്​ട്രേലിയ എന്നിവ നേട്ടത്തിലാണ്​. ചൊവ്വാഴ്ച നേട്ടത്തോടെയാണ്​ യു.എസ്​ വിപണി വ്യാപാരം അവസാനിപ്പിച്ചത്​.

ബജറ്റിൽ മൂലധനനിക്ഷേപം ഉയർത്തിയത്​ ഇൻഫ്രാസ്​ട്രെക്​ചർ കമ്പനികൾക്ക്​ ഗുണകരമാവുമെന്നാണ്​ ഓഹരി വിപണിയുടെ പ്രതീക്ഷ. അതേസമയം, കഴിഞ്ഞ ദിവസവും വിദേശനിക്ഷേപകർ വിപണിയിൽ വിൽപ്പനക്കാരായിരുന്നു. 21.79 കോടിയുടെ ഓഹരികൾ വിദേശനിക്ഷേപകർ വിറ്റപ്പോൾ ആഭ്യന്തര ഇൻസ്റ്റിറ്റ്യൂഷണൽ നിക്ഷേപകർ 1,597.70 കോടിയുടെ ഓഹരികൾ വാങ്ങി.